На жаль, пад забарону трапілі і кнігі з Беларусі.
Малдова і Украіна працягваюць пазбаўляцца ад расейскай інфармацыйнай прадукцыі, пакуль Расея вядзе захопніцкую вайну ва Украіне.
19 чэрвеня Вярхоўная Рада Украіна забараніла расейскую музыку ва ўкраінскіх медыях і грамадскай прасторы. За такое рашэнне прагаласавалі 303 дэпутаты, паведамляе народны дэпутат Яраслаў Жалязняк.
Таксама 306 дэпутатаў падтрымалі забарону імпарту і распаўсюду кніг і іншай выдавецкай прадукцыі з Расеі і Беларусі.
А ў Малдове забароняць трансляцыю расейскіх тэленавінаў. Адпаведны закон падпісала прэзідэнтка краіны Мая Санду, піша NewsMaker.md.
«На наступным тыдні закон уступіць у сілу, і пакаранне за прапаганду будзе значна больш жорсткім», – паінфармавала кіраўніца Рады тэлебачання і радыё Ліліяна Віцу.
Цяпер у Малдове забароненыя палітычныя ці ваенныя навіны і праграмы з краінаў, якія не ратыфікавалі Канвенцыю аб трансгранічным тэлебачанні, у тым ліку з Расеі. З уступленнем у сілу гэтага закону праграмы больш не будуць транслявацца ў эфірных сетках.
Таксама закон уводзіць паняцце дэзынфармацыі, якое прадугледжвае нашмат больш жорсткія санкцыі.
Якуб Хруст belsat.eu
