Жыхар Гомля размясціў у TikTok відэа, на якім бачна, як людзі чакаюць раніцай адкрыцця паліклінікі №8 на вуліцы Багданава, каб узяць талончык да лекара, піша «Флагшток».
Каб трапіць на прыём да лекара, гамельчукі ад 6-й гадзіны раніцы, у любое надвор’е, стаяць каля ўваходу ў паліклініку і чакаюць, пакуль іх запусцяць унутр, каб атрымаць талончык, распавёў мясцовы жыхар Уладзімір.
Асабліва шмат людзей стаіць перад паліклінікай у панядзелкі, адзначае аўтар відэа:
,,«Сёння серада. Гэта малая частка таго, што робіцца ў панядзелак. Людзі хворыя, жывуць далёка, транспарт яшчэ не ходзіць, ідуць пешшу ў чаканні і надзеі, што трапяць да лекара. Ніводнай лаўкі нават няма. Вось такое стаўленне да людзей».
У каментарах падпісчыкі распавялі, што такая ж сітуацыя і ў іншых мікрараёнах Гомлю, і гарадах Беларусі.
Некаторыя выказалі здзіўленне: чаму нельга запісацца да лекара праз інтэрнэт? Справа ў тым, што свабодных талонаў пры дыстанцыйным запісе часта няма. Таму людзям даводзіцца прыходзіць асабіста, каб атрымаць талон, які пакідаюць для «жывой чаргі».
У канцы 2024 года ў Беларусі было 56,2 доктара-спецыяліста. Гэта на 400 больш, як было ў канцы 2023-га. Пры гэтым у краіне за год зменшылася колькасць медычных установаў. Такія звесткі вынікаюць са свежага агляду Белстату да Дня медычнага работніка ў Беларусі.
Колькасць амбулаторна-паліклінічных арганізацыяў таксама знізілася на 14. Іх засталося 2693. Шпіталяў у канцы 2024 года было 564 (на 5 менш, як у 2023 годзе), а станцыяў хуткай дапамогі – 86 (на 31 менш).
Наталля Пяткевіч, першая намесніца кіраўніка адміністрацыі Аляксандра Лукашэнкі, 14 траўня падчас сустрэчы з калектывам Жабінкаўскага цукровага заводу заявіла, што адна з прычынаў недахопу дактароў і немагчымасці адразу запісацца на прыём – падвышэнне попыту на паслугі дактароў праз павелічэнне сярэдняй працягласці жыцця і старэнне насельніцтва.
Марыя Міхалевіч belsat.eu
