«Белсат» параўнаў кошты на б'юці-паслугі ў Варшаве і Менску. На некаторыя з іх кошты ў Варшаве могуць быць у разы вышэйшыя, але ў ёй і заробкі большыя. Расказваем, дзе і што танней, а таксама чаму беларускія касметолагі папулярныя ў польскай сталіцы.
Пры ацэнцы кошту паслуг мы абапіраліся на прапановы, якія спраўдзілі на сабе (у Варшаве), а таксама тыя, якія проста знайшлі ў Інтэрнэце, але палічылі прымальнымі як патэнцыйныя кліенты. У тэксце прыведзены цэны, якія трапляліся нам найбольш часта. Для зручнасці параўнання яны пераведзены ў долары.
Манікюр і педыкюрр
Цэнавы дыяпазон на манікюр можа быць вельмі шырокім ў абодвух гарадах. Напрыклад, у Варшаве можна ўдала зайсці ў салон, дзе працуюць спецыялісты з В'етнама. Такіх устаноў досыць шмат. Яны вядомыя тым, што паслугу аказваюць хутка і нядорага. Напрыклад, са зніжкай можна зрабіць манікюр і за $14.
Калі вы шукаеце месца, дзе вам было б прасцей мець зносіны з майстрам, то ёсць шмат украінскіх салонаў. Там можна аддаць як $27, так і $40. Даволі распаўсюджаны кошт, напрыклад, гібрыднага манікюру – $40. Калі дадаць фрэнч або малюнак, то даплаціць трэба будзе каля $5-8.
У Менску адзін з салонаў прапануе манікюр ад $7. На гібрыдны манікюр шмат прапаноў за $10-17. За дапаўненні накшталт фрэнчу таксама трэба будзе даплаціць каля $1,5. Некаторыя салоны ставяць варшаўскія кошты – $28-33 у залежнасці ад спецыяліста, які будзе з вамі працаваць.
На педыкюр цэны вышэйшыя. Напрыклад, у Варшаве мы сутыкнуліся з прапановамі ад $25 да $54, хоць можа быць і даражэй. $25 – усё ў тых жа в'етнамскіх майстроў. Адна з карыстальніц гэтай паслугі ў Варшаве распавяла «Белсату», што ў Менску відавочна танней – знаёмыя робяць максімум за $20. Сапраўды, у Менску шмат прапаноў за $14-22, але ёсць і за $30-36.
Стрыжка і афарбоўка
Цэны на стрыжкі ў Варшаве таксама вельмі залежаць ад майстра, месца і таго, які вынік вы хацелі б атрымаць. Па жаночых стрыжках можна знайсці прапановы за $40-55. Столькі каштаваць можа і прамы зрэз, і «каскад», і «кучаравы метад». Аднак мы знайшлі нават вельмі незвычайнае прапанову – рускамоўны майстар прыедзе да вас на дом, і каштаваць гэта будзе каля $13-19 за прамы зрэз.
Аднатонная афарбоўка часта каштуе ад $80, калі вы падфарбоўваеце карані – $50. Нам удалося знайсці майстра, які абновіць стрыжку і падфарбуе карані за $72.
Мужчынская стрыжка пад Варшавай можа абыйсціся ў $12, у самой Варшаве часта просяць $18-32. І прыкладна столькі ж за афарбоўку.
У Менску жанчынам і мужчынам падстрыгчыся можна і за $4, аднак гэта будзе простая стрыжка і такіх варыянтаў няшмат. Часцей цэны для жанчын бліжэй да $10 мінімум. Шмат варыянтаў па афарбоўванні ў адзін тон валасоў сярэдняй даўжыні ад $25.
Мужчынская стрыжка ў Менску часта каштуе $5-9, але ёсць барбершопы, якія просяць і $13, а за стрыжку і мадэляванне барады – $18.
Лазерная эпіляцыя
Пакет лазернай эпіляцыі ўсяго цела, за выключэннем рук і твару, у добрага майстра для жанчын у Варшаве можна знайсці за $135, аднак вельмі шмат прапаноў для жанчын і за $214-320. Цэны залежаць ад выгляду абсталявання і таго, як пазіцыянуюць сябе салоны. Многія, вядома, кажуць, што іх абсталяванне і сэрвіс лепшыя ў Варшаве.
У Менску шмат варыянтаў за той жа набор ад $40 да $60.
Бровы і вейкі
Карэкцыя і афарбоўка броваў у Варшаве каштуе каля $24-30. Адна з карыстальніц паслуг у Варшаве адзначае, што робіць бровы за $40 у вельмі добрага майстра, але мяркуе, што гэта даволі дорага – раней у менскім салоне «Ясь і Яніна» можна было атрымаць добры вынік «за капейкі».
Карэкцыю і афарбоўванне броваў у Менску мы знайшлі за $6,5-13.
Нарасціць вейкі ў Варшаве каштуе каля $34-77 у залежнасці ад выніку, які вы хацелі б атрымаць. У Менску шмат прапаноў за $12-35 таксама ў залежнасці ад жаданага эфекту.
Догляд твару
У Варшаве догляд твару, куды ўваходзіць чыстка, маска і хімічны пілінг, будзе каштаваць $80-106 у спецыяліста з медычнай адукацыяй. У Варшаве ёсць у тым ліку добрыя беларускія касметолагі.
,,«Наколькі я ведаю, многія полькі аддаюць перавагу хадзіць да майстроў з Беларусі і Украіны, таму што ў нас больш развітая б'юці-сфера – нашы майстры хутчэй падхопліваюць трэнды, бо дома ў іх вялікая канкурэнцыя. А яшчэ нашы лепш вядуць сацсеткі», – распавяла адна з дзяўчат, якая ходзіць да беларускага касметолага ў Варшаве.
У некалькіх медцэнтрах Менску цана за такі набор імкнецца да $100. Можна знайсці пакет і за $35 у салоне ў сертыфікаванага касметолага вышэйшага разраду.
Калі працэдуры больш складаная, то і ў Менску, і ў Варшаве кошты на якасныя паслугі звычайна высокія адносна заробкаў.
Падпампаваць вусны і ўкол ботаксу
Павелічэнне вуснаў у Польшчы каштуе прыкладна $160-350. Вельмі частая прапанова – $190. У Беларусі такая ж працэдура прапануецца ад $166-298. Дакладная цана залежыць ад салона і прэпарату, які ўводзіцца.
У Менску салоны і медцэнтры неахвотна дзеляцца цэннікам – прапануюць спачатку кансультацыю прыкладна за $17. Пры гэтым нам удалося знайсці некалькі прапаноў паслуг па ўвядзенні батулатаксіну расейскай вытворчасці на ўвесь твар за $150-166. У Варшаве за ботакс на ўвесь твар прыйдзецца заплаціць каля $400. Адна з карыстальніц гэтай паслугі ў Варшаве распавяла, што робіць працэдуру майстар з Беларусі, які бывае ў Польшчы. У гэтым выпадку працэдура каштуе, як у Менску – $150.
Такім чынам, б'юці-паслугі ў Варшаве бываюць у разы даражэйшыя, чым у Менску. Пры гэтым і зарабляюць людзі ў Польшчы больш. Паводле Белстату, сярэдні намінальны заробак (да выплаты падаткаў) у Беларусі ў красавіку склаў $868. А ў Польшчы – $2417.
Арсен Рудэнка / АБ belsat.eu
