Мазепіна называлі і «гаманцом Лукашэнкі», і фінансавальнікам «Nexta».
Еўрапейскі суд агульнай юрысдыкцыі пакінуў у моцы санкцыі супраць былога ўладальніка расейскага «Уралхіму» Дзмітрыя Мазепіна, адхіліўшы 8 лістапада ягоны пазоў.
Паводле суда, Рада Еўразвязу падала неабходнае абгрунтаванне сваіх рашэнняў для ўвядзення санкцыяў, а Дзмітрый Мазепін – асноўны бізнесовец у сектары, што застаецца істотнай крыніцай даходу расейскага ўраду. Расейскі ж урад вядзе вайну ва Украіне – санкцыі маюць на мэце зрабіць тую вайну даражэйшай. Суд, сярод іншага, згадаў, што Мазепін разам з яшчэ 36 бізнесоўцамі быў на сустрэчы з Уладзімірам Пуціным у першы дзень поўнамаштабнага ўварвання.
Санкцыі супраць Мазепіна ўвялі 9 сакавіка 2022 года, замарозілі ягоныя актывы ў Еўропе і забаранілі ўезд у Еўразвяз. Мазепін неўзабаве прадаў кантрольны пакет акцыяў «Уралхіму», пакінуў кіроўныя пасады і папрасіў зняць з яго неабгрунтаваныя (на ягоную думку) абмежаванні.
Мазепін нарадзіўся ў Менску, але паехаў вучыцца ў Расею, дзе заснаваў свае першыя кампаніі, у тым ліку ТАА «Белнафта». У 2004 годзе пачаў купляць акцыі хімічных камбінатаў, у выніку аб’яднаў камбінаты ў кампанію «Уралхім», у 2013 годзе купіў буйны пакет акцыяў «Уралкалію» і стаў фактычным кіраўніком кампаніі.
Сярод іншага, быў старшынём Расейска-беларускай бізнес-рады пры расейскай Гандлёва-прамысловай палаце. Ад імя гэтай рады заклікаў праціўнікаў Аляксандра Лукашэнкі да стварэння «Камітэту нацыянальнага ратавання». Хадзілі чуткі пра тое, што Мазепін фінансаваў сетку каналаў «Nexta», але гэтыя чуткі зняпраўджваў і сам Мазепін, і Крэмль. З другога боку, некалі Мазепіна называлі і «гаманцом Лукашэнкі».
Алесь Наваборскі belsat.eu
