Беларус Уладзіслаў Хандогій адзначыўся на 23-м Міжнародным конкурсе піяністаў імя Хасэ Ітурбі ў іспанскай Валенсіі, які прайшоў 4–14 чэрвеня. Пра гэта паведамляе выданне «Беларусь и мир».
«Еўрабачанне-2025»: памылка букмекераў і антываенны сцяг у трансляцыі
Чытайце таксама:
Якія музычныя оўпэн-эйр фестывалі пройдуць летам у Беларусі і хто там гэдлайнеры
Журы прысудзіла нашаму беларусу другое месца, што прынесла яму прэмію 20 тысяч еўраў і ангажэмент на ўдзел у канцэртным туры. Акрамя таго, Уладзіслаў Хандогій атрымаў яшчэ дзве адмысловыя ўзнагароды: прыз глядацкіх сімпатыяў (2 тысячы еўраў) і прыз за найлепшае выкананне канцэрту Людвіга ван Бэтховэна (2 тысячы еўраў).
Першае месца ў конкурсе ўзяў Ізраільцянін Набіль Гаек, трэцяе – італьянец Руджэра Ф’ёрэлля. Агулам заяўкі на ўдзел паступілі ад каля 200 прэтэндэнтаў з 40 краінаў.
Уладзіслаў Хандогій нарадзіўся ў 2001 годзе ў Менску ў сям’і музыкаў. Навучаўся ў Рэспубліканскай гімназіі-каледжы пры Беларускай дзяржаўнай акадэміі музыкі, затым у Цэнтральнай музычнай школе пры Маскоўскай дзяржаўнай кансерваторыі імя Пятра Чайкоўскага, з 2020 года працягвае навучанне ў кансерваторыі.
Пераможца V Міжнароднага конкурсу юнацкага выканальніцкага мастацтва імя Свірыдава ў Санкт-Пецярбургу (2013), II Міжнароднага конкурсу юных піяністаў «Astana Piano Passion» і XV Міжнароднага тэлевізійнага конкурсу юных музыкантаў «Шчаўкунок» (2014). Лаўрэат II Міжнароднага конкурсу маладых піяністаў «Grand Piano Competition» у Маскве (2018), дыпламант X Міжнароднага конкурсу юных піяністаў імя Джыны Бахаўэр у Солт-Лэйк-Сіці (ЗША, 2016). Стыпендыят фонду «Новыя імёны» (Расея).
У 2021 годзе атрымаў першую прэмію на XXXII міжнародным конкурсе «Ferrol International Competition» (Іспанія). Таксама атрымаў першыя прэміі на конкурсах у Санрэма («Sanremo international piano competition») і «La palma d'oro» ў Італіі. У 2022 годзе стаў фіналістам аднаго з самых прэстыжных міжнародных конкурсаў імя Вэна Клайбэрна ў Тэхасе, ЗША.
Выступае ў гарадах Расеі, Беларусі, Францыі, Вялікай Брытаніі, Іспаніі, Італіі, Швейцарыі і іншых краінаў. Запісаў сольны дыск у 2016 годзе.
Якуб Хруст belsat.eu
