«Пакаяннае відэа» з ім з’яўлялася раней на прапагандысцкім тэлебачанні.
29 студзеня пачаўся суд над галоўным спецыялістам галоўнага ўпраўлення наяўнага грашовага абарачэння Нацыянальнага банку Аляксандрам Цярэшчанкам. Мужчыну судзяць за ахвяраванні.
Як паведамляюць праваабаронцы, Аляксандра Цярэшчанку судзяць паводле арт. 361-2 Крымінальнага кодэксу («Фінансаванне дзейнасці экстрэмісцкага фармавання»).
Суд праходзіць у Менскім гарадскім судзе. Працэс вядзе суддзя Сяргей Кацэр, які ўдзельнічаў мінімум у 202 палітычных працэсах.
Як вядома, «пакаяннае відэа» з Аляксандрам Цярэшчанкам было паказанае ў адной з праграмаў прапагандыста Грыгорыя Азаронка: у ім затрыманы кажа, што браў удзел у акцыях пратэсту, рабіў рэпосты ў сацыяльных сетках на тэму выбараў і каронавіруса.
Адметна, адзначаюць праваабаронцы, што ў праграме Цярэшчанку назвалі таксама афіцэрам і «кіраўніком КДБ Барысаўскага раёну».
Падрабязнасці справы і мера стрымання, прымененая да Цярэшчанкі, праваабаронцам невядомыя.
«Вясна» паведамляе, што ў Беларусі мінімум 58 чалавек асуджаныя паводле артыкулу «Фінансаванне экстрэмісцкай дзейнасці» (або ў сукупнасці з іншымі) на тэрміны ад 1,5 да 19 гадоў калоніі. За ахвяраванні ў структуры, прызнаныя «экстрэмісцкімі фармаваннямі», у Беларусі пагражае да 5 гадоў калоніі – нават тады, калі яны яшчэ не былі прызнаныя экстрэмісцкімі. Акрамя таго, адзначае «Вясна», за ахвяраванні судзяць паводле артыкулу «Фінансаванне тэрарыстычнай дзейнасці» – паводле яго ўжо асудзілі як мінімум двух чалавек на 9,5 і 8,5 года калоніі.
Нядаўна ў Менску з’явіліся білборды, на якіх ад імя Дэпартаменту фінансавых расследаванняў Камітэту дзяржкантролю пагражаюць адказнасцю за данаты – пазбаўленнем волі ад 3 да 8 гадоў.
Раман Шавель belsat.eu
