Зіма сустрэлася з вясною, каб пазмагацца за права яшчэ паваладарыць. Але безвынікова! Сонца, птушкі ды вясёлыя песні-вяснянкі надаюць моц вясне!
У Беларускім дзяржаўным музеі народнай архітэктуры і побыту рэканструявалі свята Грамніцы з вёскі Баршчоўка Добрушскага раёну Гомельскай вобласці.
Цэнтральнае месца свята – грамнічная свечка. Яе катаюць з адмысловага воску.
Воск такой свечкі больш нідзе не выкарыстоўваюць. А свечку трымаюць у хаце і запальваюць улетку ў навальніцу, каб маланка не трапіла ў дом.
І пакуль адныя занятыя побытавымі клопатамі, іншыя клікаюць вясну песнямі ды танцамі, і нават упрыгожваюць ялінку.
«Гарадское насельніцтва прызвычаіліся ўпрыгожваць ялінку пад Новы год. А жыхары Палесся выкарыстоўваюць гэтае дрэва ва ўсіх абрадах – і на вяселлях і на пахаваннях», – кажа загадчыца культурна-адукацыйнага аддзелу Паліна Курановіч.
Здаецца, вогнішча ўсё ж такі прагнала зіму прэч.
Таццяна Уласенка, фота аўтара/Belsat.eu
