Начальнік Галоўнага ўпраўлення разведкі Мінабароны Украіны Кірыл Буданаў лічыць, што Аляксандр Лукашэнка не збіраецца ўступаць у вайну супраць Украіны.
Паводле Кірыла Буданава, падчас перамоваў у Сочы расейскае кіраўніцтва намагалася дамагчыся ад Лукашэнкі ўступлення ў вайну ў пэўным «фармаце» (ён не ўдакладніў, у якім). Паводле кіраўніка ГУР, Лукашэнка ўхіляецца ад гэтага: не адмаўляецца і не пагаджаецца, але «робіць насамрэч усё, каб гэтага не адбылося».
«Ён баіцца гэтага. Ён зробіць усё, каб Беларусь [у вайну] не ўступіла», – заявіў Буданаў у інтэрв’ю ўкраінскай журналістцы Наталлі Масейчук.
Буданаў падкрэсліў, што пакуль у Беларусі няма 20 тысяч расейскіх вайскоўцаў, пра якіх раней паведамлялася. «Іх там няма. Калі будзе падрыхтоўка да такога працэсу, мы пра гэта будзем ведаць і будзем прымаць адпаведныя захады», – заявіў ён.
На думку Буданава, Беларусь цяпер у значнай ступені залежыць ад пазіцыі Кітаю. «У бліжэйшы час яны Расею перастануць пытацца пра нешта… Кітай – у адрозненне ад Расеі – насамрэч уплывовая зараз дзяржава. Расея – гэта выключна залежная тэрыторыя, не больш», – заявіў ён.
Глеб Нержын belsat.eu
