Аб гэтым «Белсату» паведаміла ягоная нявеста Надзея Салодкая.
Аднаго з фігурантаў «справы Ціханоўскага» Вяргілія Ушака выпускаюць з СІЗА №1. Аб гэтым каля 20:00 «Белсату» паведаміла ягоная нявеста Надзея Салодкая.
Надзея даведалася, што Вяргілій выходзіць на волю сёння, 29 ліпеня, прыкладна а 16-ай гадзіне.
«Мне паведаміў адвакат, што яму змянілі меру стрымання на падпіску аб нявыездзе».
Сам Вяргілій звязвае сваё вызваленне са сканчэннем 2-х месячнага тэрміну затрымання.
«Мяне толькі зараз знайшлі жонка і мае дзяўчынкі. Пасля вызвалення я да людзей нават баяўся падысці. Спрабаваў патэлефанаваць, але няправільны нумар набраў», — так ён згадвае свой выхад з СІЗА.
Зараз Вяргілій і Надзея будуць далей насіць перадачы, дасылаць лісты затрыманым і падтрымліваць астатніх палітзняволеных.
«Гэта тое, што мы можам зрабіць для іх», – кажа дзяўчына.
Яна кажа, што падтрымлівае нявесту і матулю Змітра Фурманава, якія зараз галадаюць пад СІЗА №1. Яна прыходзіць і размаўляе з жанчынамі, «бо ім вельмі складана зараз».
Зараз яна кажа, што вельмі шчаслівая.
«Я так радая, аднак чакаю, пакуль гэта хутчэй усё скончыцца да канца. Ва ўсіх!», – спадзяецца Надзея.
Вяргілій Ушак быў аператарам на пікеце Сяргея Ціханоўскага ў Горадні 29 траўня. Ён здымаў штурханіну з міліцыянтамі на камеру. За кратамі абвясціў галадоўку. Паводле ягонай нявесты Надзеі, удзел у пікеце стала ягонай першай у жыцці грамадзянскай актыўнасцю.
Ён стаў чацвёртым фігурантам «справы Ціханоўскага», якога вызвалілі.
КТ belsat.eu