Міністр абароны Ізраілю распавёў, колькі часу зойме наземная аперацыя ў сектары Газа
Міністр абароны Ёаў Галянт заявіў, што наземны наступ Ізраілю ў сектары Газа можа доўжыцца тры месяцы. Пра гэта паведамляе «The Times of Israel».
«Гэта павінен быць апошні [наземны] манеўр у Газе па той простай прычыне, што пасля яго не будзе «Хамасу». Гэта зойме месяц, два месяцы, тры, але ў рэшце рэшт «Хамасу» не стане», – адзначыў міністр.
«Перш чым праціўнік сустрэнецца з бранятэхнікай і пяхотай, ён сустрэнецца з бомбамі вайскова-паветраных сілаў», – працягвае ён.
«У мяне склалася ўражанне, што вы ведаеце, як зрабіць гэта смяротна, дакладна і вельмі якасна, як гэта было даказана да гэтага часу», – дадаў Галянт, звяртаючыся да афіцэраў каманднага цэнтру ВПС.
Нагадаем, 7 кастрычніка баевікі «Хамас» правялі беспрэцэдэнтную атаку на Ізраіль, у выніку якой былі забітыя каля 1400 чалавек і ўзятыя ў закладнікі больш за 200 чалавек. Неўзабаве пасля нападу тэрарыстаў прэм’ер-міністр Бэньямін Нэтаньягу заявіў, што плануе цалкам знішчыць «Хамас», і анансаваў наземную аперацыю ў сектары Газа. Каля межаў сектару Газа былі сканцэнтраваныя дзясяткі тысяч ізраільскіх вайскоўцаў.
Дата пачатку наземнай аперацыі застаецца невядомай. Пакуль Ізраіль працягвае наносіць паветраныя ўдары па інфраструктуры «Хамас».
Глеб Нержын belsat.eu
