Украіна папрасіла ў Расеі адкрыць гуманітарны калідор для жыхароў акупаваных тэрыторыяў вакол Запарожскай атамнай станцыі праз бесперапынныя абстрэлы, заявіла віцэ-прэм’ер, міністарка рэінтэграцыі часова акупаваных тэрыторыяў Ірына Вэрэшчук. Аднак адказу ад Масквы не атрымала.
«Расейская дзяржава непасрэдна займаецца ядравым тэрарызмам. Гэта першы прэцэдэнт у гісторыі чалавецтва. Расейцы трымаюць у закладніках не толькі персанал станцыі. У закладніках і жыхары часова акупаваных тэрыторыяў, прылеглых да ЗАЭС. Дзясяткі тысяч людзей», – заявіла Вэрэшчук.
Таксама Ірына Вэрэшчук звярнулася да жыхароў часова акупаваных тэрыторыяў пры станцыі:
«Эвакуюйцеся! Знайдзіце спосаб перабрацца на падкантрольную тэрыторыю. Мы вас чакаем і дапаможам», – заявіла міністарка рэінтэграцыі часова акупаваных тэрыторыяў Украіны.
Міністэрства рэінтэграцыі Украіны запытала ў Расеі гуманітарны калідор для эвакуацыі цывільнага насельніцтва, якое пражывае побач з атамнай электрастанцыяй. Але ў адказ не атрымала нічога.
Алена Рувіна belsat.eu