23 красавіка міністр замежных справаў Польшчы Радослаў Сікорскі выступіў перад польскімі дэпутатамі і прэзентаваў інфармацыю пра замежную палітыку Варшавы на 2025 год.
Кіраўнік МЗС Польшчы падчас выступу ў Сейме заявіў, што на пасадзе міністра сутыкнуўся з цяжкасцямі, перадусім праз геапалітычныя змены ў свеце.
Паводле міністра, Польшча мае стацца архітэктарам новай мадэлі бяспекі ў рэгіёне. Сікорскі таксама звярнуў увагу на чатыры тэндэнцыі, якія цяпер непажаданыя з польскага гледзішча:
- падзел свету на зоны ўплыву;
- адыход ад павагі да суверэнітэту на карысць сілы;
- адмова ад павагі да міжнародных інстытутаў;
- дэзынфармацыя.
Польшча і ЕЗ у цэлым мусяць супрацьстаяць гэтым выклікам, а таксама інвеставаць у сваю абарону, каб забяспечыць мір у рэгіёне.
Як сказаў Сікорскі, «вынік вайны Расеі з Украінаю вызначыць узровень бяспекі нашага рэгіёну на гады наперад»:
«Ад гэтага залежыць, напрыклад, ці пагрузіцца Беларусь у „рускі свет“ або здолее захаваць рэшткі сваёй незалежнасці».
Асобна разважаючы пра Беларусь, міністр замежных справаў Польшчы нагадаў пра сітуацыю, звязаную з палітычным вязнем Анджэем Пачобутам. Маўляў, месца беларусаў – у абʼяднанай Еўропе, і Польшча не павінна пакідаць сваіх намаганняў дзеля свабоднай Беларусі:
,,«Мы не губляем надзеі, калі ідзецца пра лёс Беларусі, хаця, вядома ж, мы не наіўныя. Мы рэалістычна ацэньваем кіраванне Аляксандра Лукашэнкі, які паставіў сваю краіну ў залежнасць ад Крамлю. Беларускае грамадства, улучна тысячаў нашых суайчыннікаў, заслугоўваюць лепшай будучыні. Мы патрабуем вызвалення палітычных вязняў, у тым ліку Анджэя Пачобута. Мы пільнуем, каб пытанні падтрымання беларускай грамадзянскай супольнасці займалі важнае месца ў павестцы дня ЕЗ. Месца беларусаў – у аб'яднанай Еўропе».
Медыі, якія фінансуюцца Міністэрствам замежных справаў, маюць пашыраць дзейнасць на постсавецкай прасторы.
«У створаным у TVP Асяродку медыяў для замежжа працуюць рэдакцыі тэлеканалаў «Белсат», «Вот так», «Slawa» і «TVP World»... Ахоп гэтых медыяў, якія фінансуюцца МЗС, налічвае мільёны праглядаў – і гэта доказ таго, што ў краінах былога Савецкага Саюзу ёсць попыт на верагодную інфармацыю», – заявіў Радослаў Сікорскі.
Паводле яго, Варшава спрабуе дамагчыся еўрапейскага фінансавання рэдакцыяў:
«Мы намагаемся зацікавіць нашых партнёраў з Еўразвязу магчымасцямі гэтых рэдакцыяў з мэтаю павелічэння іх фінансавання і пашырэння ахопу».
Польшча мае працягваць барацьбу з дэзынфармацыяй і мусіць клапаціцца пра стан польскай кібербяспекі. Сікорскі дадаў, што Польшча выступае за ўмацаванне Еўрапейскага фонду падтрымання дэмакратыі.
belsat.eu
