Аляксандр Лукашэнка падпісаў Закон аб ратыфікацыі дамовы паміж Рэспублікаю Беларусь і Расейскаю Федэрацыяй аб гарантыях бяспекі ў межах Саюзнай дзяржавы. Адбылося гэта ў адзін дзень з тым, як Дзяржаўная дума РФ дала Менску адтэрмінаванне на выплату пазык.
Пра падпісанне Закону аб ратыфікацыі дамовы прэс-служба Аляксандра Лукашэнкі паведаміла 4 сакавіка.
Дакумент, у прыватнасці, прадугледжвае, што «з мэтаю перадухілення і адбіцця актаў агрэсіі ў дачыненні Рэспублікі Беларусь на тэрыторыі Рэспублікі Беларусь могуць стварацца вайсковыя ды іншыя аб'екты Расейскай Федэрацыі, а таксама размяшчацца вайсковыя фармаванні Расейскай Федэрацыі».
Апрача таго, бакі будуць разглядаць узброены напад на любы з іх як акт агрэсіі супраць Саюзнай дзяржавы ў цэлым і будуць рабіць адпаведныя захады ў адказ з выкарыстаннем усіх сілаў і сродкаў, якія маюць у сваім распараджэнні. На дадатак бакі разглядаюць ядравую зброю РФ як тое, што «можа быць ужытае ў адказ на ўжыванне супраць любога з бакоў ядравай зброі або іншых відаў зброі масавага паражэння, а таксама ў выпадку агрэсіі супраць любога з бакоў з ужываннем звычайнай зброі, якая стварае крытычную пагрозу яго суверэнітэту або тэрытарыяльнай цэласці».
Пастанова аб ужыванні для «абароны Беларусі» размешчанай на яе тэрыторыі ядравай зброі Расейскай Федэрацыі прымаецца ў парадку, вызначаным бакамі.
Лукашэнка расплачваецца за даўгі?
Ратыфікацыя пагаднення адбылася ў адзін дзень з тым, як Дзяржаўная дума РФ ратыфікавала падпісанае 25 красавіка 2024 года пагадненне паміж урадамі Беларусі і Расеі аб змяненні ўмоваў асобных міжурадавых пагадненняў і падпісаны 11 ліпеня 2024 года пратакол, які змяняе згаданае пагадненне. Дакумент дазваляе перанесці выплаты каля 800 мільёнаў у доларавым эквіваленце з 2024 года на 7–12 гадоў на перыяд 2031–2036 гадоў. Палажэнні гэтых дакументаў канфідэнцыйныя.
,,«Лукашэнка сам набраў пазыкі ў Расеі, а цяпер расплачваецца па іх вайсковым суверэнітэтам краіны», – адзначыў кіраўнік Народнага антыкрызіснага ўпраўлення Павел Латушка.
Паводле палітыка, «Лукашэнка дзеля захавання сваёй улады перадае абарончы і вонкавапалітычны суверэнітэт у рукі Крамля». Пры гэтым «суверэнітэт ужо прададзены, але ж і даўгі нікуды не дзеліся». Ён падкрэсліў: «Лукашэнка – гэта гарант страты суверэнітэту, але ніяк не гарант незалежнасці Беларусі».
Прэзідэнт Украіны Уладзімір Зяленскі мяркуе, што Уладзімір Пуцін плануе сфармаваць 12–15 дывізіяў і «адправіць іх на навучанне, рыхтаванне, вайсковыя вучэнні ў Беларусь». На ягоную думку, пад выглядам вучэнняў будзе рыхтавацца плацдарм для наступальных дзеянняў. Але неабавязкова для нападу на Украіну, магчыма – на Літву ці Польшчу.
Міністэрства абароны Беларусі назвала дату правядзення супольных з Расеяй вучэнняў на тэрыторыі Беларусі «Захад-2025». Вядома, што вучэнні пройдуць сёлета ў сярэдзіне верасня. І, мяркуючы з усяго, будуць вельмі маштабныя: удзел у іх возьмуць каля 13 тысячаў чалавек.
Якуб Хруст belsat.eu
