У Іванаўскай вобласці Расеі быў выбух 3 студзеня. У выніку ў крытычным стане цяпер расейскі афіцэр, датычны да ўдару ракетамі па кавярні ва ўкраінскім сяле Гроза, дзе праходзілі хаўтуры, сцвярджае тэлеграм-канал ГУР Украіны. Тады загінулі 59 чалавек, у тым ліку 8-гадовы хлопчык.
ГУР Украіны не паведамляе аб прычынах выбуху, але «нагадвае: за кожнае ваеннае злачынства супраць украінскага народу будзе справядлівая адплата».
Паводле ведамства, падчас выбуху ў Шуі Іванаўскай вобласці на Расеі ў эпіцэнтры апынуўся капітан Канстанцін Нагайка.
«Ён быў на дзяжурстве ў сваёй вайсковай частцы, а цяпер – пры смерці, – сцвярджае ГУР Украіны. – У Нагайкі множныя абломкавыя паражэнні фактычна ўсіх органаў, у прыватнасці мозгу – яму зрабілі трэпанацыю чэрапа».
Паводле ГУР Украіны, Нагайка – 1995 года нараджэння.
«Беспасярэдне браў удзел у поўнамаштабнай вайне супраць Украіны. Датычны да ўдараў балістычнымі ракетамі "Іскандер" па цывільных і вайсковых аб'ектах у Сумскай і Харкаўскай вобласцях.
У прыватнасці, падраздзяленне Нагайкі здзейсніла ваеннае злачынства ў вёсцы Гроза Купянскага раёну: 5 кастрычніка 2023 года нанесла ракетны ўдар па кавярні падчас хаўтураў. Тады загінулі 59 цывільных украінцаў, сярод іх – 8-гадовы хлопчык», – паведамляе ГУР Украіны.
Арсен Рудэнка belsat.eu
