Аляксандр Лукашэнка памілаваў яшчэ 29 палітзняволеных. Усе яны «пакаяліся ў сваіх дзеяннях і звярнуліся з хадайніцтвам аб памілаванні».
Паведамленне распаўсюдзіла прэс-служба Аляксандра Лукашэнкі.
У ім гаворыцца, што сярод памілаваных 11 жанчын і 18 мужчынаў. Шасцёра з іх маладзейшыя за 25 гадоў, трое – пенсіянеры, два інваліды і 15 маюць хранічныя захворванні.
«Міністэрства ўнутраных справаў забяспечыць кантроль за правапаслухмянымі паводзінамі памілаваных», – гаворыцца ў прэс-рэлізе. Як правіла, гэта азначае татальны кантроль з боку праваахоўных органаў.
Прозвішчы памілаваных не называюцца. Найчасцей іх крыху пазней агучваюць у сваіх эфірах шараговыя прапагандысты кшталту Юрыя Васкрасенскага.
Гэта ўжо сёмая хваля памілаванняў з ліпеня гэтага года. Апошняя адбылася 20 лістапада.
Нагадаем, што пачынаючы з ліпеня паводле памілавання, падпісанага Лукашэнкам, на волю пачалі выпускаць вязняў, найчасцей групамі каля 30 чалавек.
Сярод найбольш вядомых асобаў, вызваленых паводле гэтае працэдуры, – старшыня Партыі БНФ Рыгор Кастусёў, жуналістка Ксенія Луцкіна, якія мелі цяжкія захворванні, Святлана Лупач, Дар’я Лосік. Згодна з падлікам праваабаронцаў, такім чынам на волю выйшлі 178 чалавек, некаторым з іх заставалася зусім няшмат да заканчэння тэрміну. Разам з тым за гэты ж час палітвязнямі былі прызнаныя 223 асобы. І гэта без уліку тых, каго не абвяшчаюць палітвязнямі праз нежаданне сваякоў ці праз тое, што пра затрыманні проста нічога невядома.
Раман Шавель belsat.eu
