Словам 2024 года сталася «інкамунікада». Яно азначае поўную ізаляцыю, пазбаўленне сувязі з вонкавым светам. Менавіта гэтак дадаткова катуюць шмат якіх палітвязняў.
«За слова "інкамунікада" выказаліся 26,5 % удзельнікаў сёлетняга інтэрнэт-галасавання. Гэта значна больш, чым за наступныя ў рэйтынгу словы "бясчассе", "штучны інтэлект", "экстрэмізм"», – піша мовазнаўца Вінцук Вячорка ў суполцы праекту «Толькі пра мову».
Ён адзначае, што слова «інкамунікада» – новае для беларускае мовы, граматычна пакуль не асвоенае, бывае азначэннем (напрыклад, «у сітуацыі інкамунікада») і акалічнасцю (напрыклад, «яго трымаюць інкамунікада»).
У рэжыме поўнай ізаляцыі ад вонкавага свету трымаюць шмат якіх палітвязняў. Аніякай сувязі няма з Сяргеем Ціханоўскім, Марыяй Калеснікавай, Віктарам Бабарыкам, Міколам Статкевічам, Ігарам Лосікам. Толькі нядаўна Калеснікавай дазволілі сустрэцца з бацькам пасля больш як 600 дзён у рэжыме інкамунікада.
Надоечы слова года вызначыў Оксфардаўскі слоўнік англійскай мовы: гэта панятак «brain rot», што перакладаецца як «гніенне мазгоў» або «засмечванне мазгоў». Гэта азначае пагаршэнне псіхічнага або інтэлектуальнага стану ў выніку празмернага спажывання матэрыялаў (асабліва ў інтэрнэце), якія лічыцца трывіяльнымі або непатрабавальнымі.
Расейскі лінгвістычны партал «Грамота.ру» назваў словам года «вайб», а расейская незалежная экспертная рада «Слова года» – «Навальный».
Летась беларускім словам года была «мова», у 2022-м – «вайна».
Сцяпан Кубік belsat.eu
