Пакуль беларуская хакейная зборная адхіленая ад міжнародных спаборніцтваў з увагі на суўдзел нашай краіны ў вайне ва Украіне, на сёлетнім чэмпіянаце свету адбылася сапраўдная сенсацыя: Данія ўпершыню ў гісторыі выйшла ў паўфінал турніру, выбіўшы Канаду.
Гаспадары сёлетняга чэмпіянату свету па хакеі – Данія і Швецыя. Яны і сустрэліся ў матчы за бронзу, які адбыўся сёння ў Стакгольме. З лікам 6:2 перамаглі шведы.
А 21:20 паводле менскага часу пачнецца фінал паміж ЗША і Швейцарыяй. Беларускія тэлеканалы гульні турніру не паказваюць.
«У гэтым годзе чэмпіянат сапраўды цікавы», – сказаў «Белсату» беларускі хакеіст, які пагадзіўся на каментар на ўмовах ананімнасці.
Галоўная сенсацыя сёлетняга турніру – зборная Даніі. Спачатку яна прабілася ў чвэрцьфінал, што апошні раз было ў 2016 годзе. Датчане выйшлі на аднаго з фаварытаў, каманду Канады, і іх загадзя «пахавалі». Аднак гаспадары турніру, мабыць, нечакана нават для самых сябе, перамаглі з лікам 2:1 і ўпершыню ў гісторыі выйшлі ў паўфінал.
Праўда, на гэтым трыумфальнае шэсце Даніі завяршылася: за крок да вырашальнай гульні яе спыніла Швейцарыя (7:0), а ў гульні за трэцяе месца – Швецыя, якую ў паўфінале перамагла зборная ЗША.
«Найбольш спадабаліся зборныя Даніі і Швейцарыі, вельмі ўражвае, які прагрэс яны зрабілі за апошнія гады. Асабліва Швейцарыя – стабільны рост гульцоў і добрая камандная гульня», – кажа наш суразмоўца.
Швейцарыя другі турнір запар выходзіць у фінал. Летась каманда саступіла Чэхіі, і, дарэчы, яшчэ ніколі не брала золата.
А амерыканцы апошні раз медалі найвышэйшага гатунку здабылі на сусветным першынстве ў 1960 годзе, калі хакейны турнір на Алімпійскіх гульнях адначасова лічыўся чэмпіянатам свету.
«Думаю, што пераможа ЗША, у іх вельмі моцная гульня, аднак заўзець буду ўсё адно за швейцарцаў», – прызнаўся спартовец «Белсату».
Амерыканцы ўжо гулялі з швейцарцамі на гэтым чэмпіянаце, яны былі ў адной групе. Тады перамагла Швейцарыя – 3:0.
Міжнародная федэрацыя хакею адхіліла клубы і зборныя Беларусі і Расеі ад сваіх спаборніцтваў у лютым 2022 года, калі пачалася поўнамаштабная вайна ва Украіне. Нашую краіну дыскваліфікавалі за суўдзел у расейскай агрэсіі.
Сёлета хакейны бан працягнулі і на наступны сезон.
Беларускім хакеістам пакуль даводзіцца цешыцца КХЛ і штогадовым расейскім Кубкам Першага каналу.
«У апошнія гады багата маладых гульцоў з Беларусі зрабілі вялікі прагрэс. Ці шкадуюць яны пра што-кольвек, цяжка сказаць, аднак, думаю, згуляць на чэмпіянаце свету дакладна жадаў бы кожны. Хутчэй за ўсё, яны сочаць за турнірам. Сёлета турнір сапраўды цікавы, з нечаканымі вынікамі і годным узроўнем гульні», – падкрэсліў суразмоўца «Белсату».
Ён падсумаваў, што ў Беларусі маюцца моцныя гульцы і таленавітая моладзь, аднак брак выступаў на міжнароднай арэне, «вядома ж, адаб'ецца ў будучыні».
Сцяпан Кубік belsat.eu
