Анархісту Сяргею Раманаву далі 1,5 года за «непадпарадкаванне адміністрацыі папраўчай установы». Гэта ўжо трэці прысуд палітвязню паводле такога абвінавачання. Агульны тэрмін, прызначаны мужчыну, дасягнуў 24 гадоў 5 месяцаў.
Сяргея Раманава затрымалі ў кастрычніку 2020 года разам з трыма паплечнікамі-анархістамі Ігарам Аліневічам, Дзмітрыем Дубоўскім і Дзмітрыем Рэзановічам. Іх абвінавацілі ў тэрарызме і незаконным абарачэнні зброі і прызначылі велічэзныя тэрміны. Раманаву – 22 гады 11 месяцаў.
Усе фігуранты той справы прызнаныя палітвязнямі.
Цяпер Раманаву дадалі да гэтага тэрміну 1,5 года паводле абвінавачвання ў «злосным непадпарадкаванні патрабаванням адміністрацыі папраўчай установы», паведаміў Telegram-канал «АЧК-Беларусь». Адзначаецца, што гэта ўжо трэці прысуд нібыта за непадпарадкаванне. Агульны тэрмін палітвязня дасягнуў 24 гадоў 5 месяцаў.
Акрамя таго, паведамляецца, што надоечы Раманава перавялі ў памяшканне камернага тыпу і забаранілі яму маляваць. Малюнкі, што ён высылаў у лістах, турэмная цэнзура не прапускае.
Тым часам «Наша ніва» паведаміла пра справу супраць 33-гадовай Марыны Луц, яе асудзілі за «распальванне варожасці». Выданне адзначае, што звычайна гэты артыкул ужываюць, каб пакараць за каментары ў сацсетках.
У «пераліку экстрэмістаў» пазначана, што жанчына «адбывае пакаранне». З гэтага вынікае, што яна атрымала альбо «хімію» з накіраваннем, альбо калонію.
У свае акаўнты апошні раз Луц заходзіла летась у сярэдзіне кастрычніка, а ў Тэлеграме пазначана, што была онлайн «вельмі даўно». Гэта можа сведчыць, што яна ўсё ж у калоніі.
Да канца 2022 года Марына Луц мела бізнес, займалася арганізацыяў вяселляў і іншых імпрэзаў. У 2023 годзе перакваліфікавалася ў UX/UI-дызайнера. Працавала збольшага на фрылансе.
На волі яе чакае малы сын.
Сцяпан Кубік belsat.eu
