Украіна і Расея завяршылі абмен палоннымі. Цяпер бакі маюць абмяняцца праектамі мірнай дамовы

«303 украінскія абаронцы ўдома. Трэцяя частка абмену ў фармаце „1000 на 1000“, пра які ўдалося дамовіцца ў Турцыі, завершаная», – напісаў у сваім Telegram-канале прэзідэнт Украіны Уладзімір Зяленскі.

Ён удакладніў: з расейскага палону вярнуліся вайскоўцы ЗСУ, Нацыянальнай гвардыі, Дзяржаўнай памежнай службы і Дзяржаўнай спецыяльнай службы транспарту.

Зяленскі паабяцаў, што Украіна «абавязкова верне кожнага і кожную з расейскага палону».

Усе тры этапы абмену праходзілі праз тэрыторыю нашай краіны. Як толькі ўкраінцы аказаліся на радзіме, яны павыкідалі ў смеццевыя кантэйнеры чорныя турэмныя робы, а таксама харчовыя пакеты, што даюць палонным у Беларусі.

Украінцы пасля вяртання дадому хуталіся ў нацыянальныя сцягі і сцягі сваіх вайсковых фармаванняў, а расейцы фатаграфаваліся не толькі з дзяржаўным сцягам, але і чырвоным савецкім з сярпом і молатам ды імперскім чорна-жоўта-белым.

Пра гэты маштабны абмен палоннымі Украіна і Расея дамовіліся падчас сустрэчы ў Стамбуле. Днямі кіраўнік расейскага МЗС Сяргей Лаўроў паведаміў, што ў Маскве завяршаюць працу над праектам мірнай дамовы. Пра гэта таксама раней дамовіліся ў Турцыі:

«Актыўна працуем над другою часткаю дамоўленасцяў, што прадугледжвае рыхтаванне кожным з бакоў праекту дакументу з выкладаннем умоваў дасягнення ўстойлівай, доўгатэрміновай, усёабдымнай дамоўленасці наконт урэгулявання. Як толькі скончыцца абмен ваеннапалоннымі, да гэтага часу мы будзем гатовыя перадаць украінскаму боку праект такога дакументу».

Пры гэтым намеснік старшыні верхняй палаты расейскага парламенту Канстанцін Касачоў казаў, што зместу гэтага мемарандуму абнародаваць не будуць.

Украіна раней прапаноўвала Расеі часовае замірэнне без папярэдніх умоваў, каб пачаць перамовы. Крэмль на гэта не пагадзіўся і замест спынення агню прапанаваў сустрэчу ў Стамбуле. У Кіеве спачатку адмаўляліся, аднак урэшце пайшлі на гэта.

Сцяпан Кубік belsat.eu