Кіраўніца дыпламатыі Еўразвязу Кая Калас заявіла, што «наймацнейшы міжнародны ціск на Расею» дазволіць спыніць вайну ва Украіне. Так яна адрэагавала на маштабную атаку, якую расейскія войскі ўчынілі мінулаю ноччу.
Вярхоўная прадстаўніца ЕЗ у замежных справах і палітыцы бяспекі Кая Калас упэўненая: чарговая атака Расеі сведчыць, што Масква «імкнецца да новых пакутаў і знішчэння Украіны».
«Жахліва бачыць дзяцей сярод нявінных ахвяраў, якіх калечаць і забіваюць. Мае думкі сёння з іхнымі сем'ямі», – напісала Калас у сваім акаўнце ў X.
,,«Нам трэба як мага большы міжнародны ціск на Расею, каб спыніць гэтую вайну».
Ціск на Крэмль у сваёй заяве адзначаў і прэзідэнт Украіны Уладзімір Зяленскі:
«Маўчанне Амерыкі, маўчанне іншых у свеце толькі падбадзёрвае Пуціна. Без сапраўды моцнага ціску на расейскае кіраўніцтва гэтай жорсткасці не спыніць. Санкцыі дакладна дапамогуць. Цяпер важная рашучасць: Злучаных Штатаў, еўрапейскіх краінаў, усіх тых у свеце, хто хоча міру».
Паводле ЗСУ, мінулаю ноччу расейскія войскі запусцілі па Украіне 9 балістычных ракетаў «Іскандэр», 55 крылатых ракетаў Х-101 і «Калібр», адну крылатую ракету Х-22, 4 авіяцыйныя ракеты Х-59/69 і 298 беспілотнікаў.
Украінская СПА збіла 45 ракетаў і 139 дронаў. 2 ракеты, 127 беспілотнікаў былі або «лакацыйна страчаныя», або знядзеяныя радыёлакацыйнымі сродкамі.
У выніку атакі пацярпелі Кіеў і Кіеўская вобласць ды яшчэ 11 рэгіёнаў. Як паведаміў кіраўнік МУС Украіны Ігар Клымэнка, загінулі 12 асобаў, больш за 60 пацярпелі.
Сярод забітых – трое дзяцей з адной сям'і ў Жытомірскай вобласці. Іхных бацькоў шпіталізавалі, маці – у цяжкім стане.
Сцяпан Кубік belsat.eu
