Пераходны кабінет паведаміў пра сустрэчу сваёй кіраўніцы Святланы Ціханоўскай з новым спікерам Каардынацыйнай рады Арцёмам Бруханом. Пра што размаўлялі?
Абраная прэзідэнтка Беларусі, кіраўніца Аб'яднанага пераходнага кабінету Святлана Ціханоўская павіншавала Арцёма Брухана з абраннем на пост старшыні Каардынацыйнай рады. Гэтая пасада стала вакантнай пасля знікнення Анжалікі Мельнікавай.
Пра былую спікерку палітыкі таксама паразмаўлялі, перадае Telegram-канал Кабінету:
,,«Абмеркаваная сітуацыя з Анжалікай Мельнікавай, яе магчымыя і рэальныя наступствы, неабходныя захады ва ўмацаванні бяспекі дзейнасці дэмакратычных сілаў агулам і Каардынацыйнай рады ў прыватнасці».
Ціханоўская выказала словы падтрымання Каардынацыйнай радзе і адзначыла важнасць гэтага інстытуту дэмакратычных сілаў, што мае быць суб’ектам транзіту ўлады ў Беларусі.
Акрамя таго, Ціханоўская і Брухан абмеркавалі арганізацыю і правядзенне слуханняў у КР, падчас якіх Пераходны кабінет адсправаздачыцца напярэдадні канферэнцыі «Новая Беларусь».
Спікер Рады не выключыў, што таксама адбудуцца слуханні канцэпцыяў наконт люстрацыі і інстытуту ўпаўнаважанага ў правах чалавека, а камісія ў справе рэформаў, як сказаў Брухан, плануе прапанаваць дэлегатам паўдзельнічаць у далейшай распрацоўцы законапраектаў новай Беларусі.
Сярод міжнародных планаў – працяг удзелу дэлегацыі Каардынацыйнай рады ў дзейнасці ПАРЕ і ў Кангрэсе мясцовых уладаў, а таксама міжпарламенцкая супраца.
Анжаліка Мельнікава пакінула тэрыторыю Польшчы і Еўразвязу 26 лютага, а 25 сакавіка перастала выходзіць на сувязь.
Цягам двух месяцаў Мельнікава вывела $ 150 тысячаў з рахункаў фонду «Białoruś Liberty», якім яна кіравала. Гэта былі грошы Каардынацыйнай рады і «Кіберпартызанаў», пералічаныя донарамі.
Пры гэтым дасюль не вядома, добраахвотна Мельнікава пераводзіла грошы або пад прымусам ці ў выніку шантажу.
Журналісты-расследавальнікі з польскага выдання «Polityka» і расейскага выдання «The Insider» сцвярджаюць, што Мельнікава сустракалася і лятала ў адпачынак з Аляксеем Лабеевым, які, імаверна, працаваў у ГРУ Беларусі і меў пашпарт прыкрыцця на імя Аляксея Гардзеева.
Сляды Мельнікавай губляюцца ў Дубаі, куды яна прыляцела з Шры-Ланкі на пачатку сакавіка.
Сцяпан Кубік belsat.eu
