Сітуацыя на беларускай мяжы з краінамі Еўрапейскага Звязу працягвае заставацца складанай. Пра гэта сведчаць як афіцыйныя звесткі Дзяржаўнага памежнага камітэту, гэта і паведамленні з памежных чатаў.
Паводле звестак ДПК станам на 12:00 паводле беларускага часу, выезду з Беларусі ў ЕЗ чакалі 460 легкавых аўтамабіляў, у тым ліку 10 у «Грыгароўшчыне» – у Латвію, 120 у «Беняконях» і 130 у «Каменным Логу» – у Літву, 200 у «Берасці» – у Польшчу. Што датычыць аўтобусаў, то 14 з іх стаялі ў «Каменным Логу» і 40 у «Берасці».
Асобную чаргу складаюць фуры: іх стаіць 380 у «Грыгароўшчыне», 740 у «Каменным Логу» і 890 у «Беняконях».
Да 32 гадзінаў на мяжы
Праз вялікую колькасць машынаў шмат хто вымушаны стаяць на мяжы больш як суткі. Напрыклад, стаяння ў зоне чаканне пры выездзе з Беларусі ў Літвы можа даходзіць да 31-32 гадзінаў, тады як сам кантроль займае толькі 1,5-2 гадзіны. Тыя, хто здолеў гэта адстаяць, жадаюць рэшце «поспехаў і вытрымкі».
У аўтобусаў час стаяння на мяжы меншы – 14-16 гадзінаў з Беларусі ў Літву і каля шасці-васьмі гадзінаў на мяжы з Польшчы ў Беларусі і да 23 гадзінаў у зваротным кірунку.
Праз вялікія чэргі на мяжы шмат якія аўтобусы, якія едуць у Беларусь, пераносяць час свайго выезду. Гэтак, аўтобус «Менсктрансу» мусіў 2 жніўня выехаць з Вільні а 16:00, зрабіў гэта толькі а 02:00 наступнага дня. Сённяшні рэйс з Варшавы перанесены 08:45 на 13:00, а аўтобус Гданьск – Менск замест 14:00 3 жніўня адправіцца а 7:00 4 жніўня.
У выніку аўтобусы з перанесеным часам адпраўлення часта падбіраюць пасажыраў пазнейшых рэйсаў, тады як іхныя пасажыры шукаюць больш раннія. У каментарах адзначаюць, што кіроўца можа адмовіцца ўзяць на рэйс пасажыра, у якога няма раздрукаванага квітка, а ёсць толькі электронны.
Асабліва раздражняе людзей на мяжы тыя, хто прадае месцы ў чэргах або спрабуе ўлезці ў чаргу.
«Улезуноў ганялі ўсім сялом», – адзначаюць кіроўцы.
У выніку рэйдаў ДАІ некаторыя з іх былі аштрафаваныя, а прадаўцы перамясціліся з беларускага на польскі бок мяжы.
Таксама людзі на мяжы адзначаюць і ўзмоцненыя праверкі, з якімі сутыкаюцца беларусы па вяртанні з Еўразвязу.
Нагадаем, што з 16 жніўня ўсім легкавым аўтамабілям на беларускай рэгістрацыі, незалежна ад грамадзянства іх уладальніка або кіроўцы, забароняць уезд у Літву. Да гэтага дазволены ўезд легкавых аўтамабіляў на беларускай рэгістрацыі пры ўмове, што імі кіруе ўласнік, які мае дзейную літоўскую візу або від на жыхарства. Латвія забараніла ўезд на беларускіх нумарах з 16 ліпеня.
Якуб Хруст, «Белсат»
