Беларускіх добраахвотнікаў называюць самымі неабароненымі.
На сайце прэзідэнта Украіны з’явілася петыцыя за наданне грамадзянства або іншага прававога статусу тым замежнікам, якія «ва ўмовах вайны абараняюць тэрытарыяльную цэласнасць і суверэнітэт Украіны».
Петыцыя на момант публікацыі мае менш за 5 тысяч подпісаў з неабходных 25 тысячаў – калі набярэцца 25 тысячаў, прэзідэнт будзе абавязаны разгледзець зварот. Збор подпісаў пачаўся 1 чэрвеня, працягнецца яшчэ 89 дзён.
Дзейнае ўкраінскае заканадаўства не прадугледжвае прадстаўлення ўкраінскага грамадзянства замежнікам, якія ваююць за Украіну, таму ў выпадку ранення, смерці або палону замежныя добраахвотнікі і іхныя сем’і не будуць мець належнай сацыяльнай і прававой абароны. Напрыклад, палонных беларусаў Расея зможа не абменьваць з Украінай, а выдаваць беларускім уладам.
,,«На дадзены момант гэтая катэгорыя замежных добраахвотнікаў найбольш уразлівая, бо Беларусь падтрымлівае Расею ў вайне супраць Украіны», – пішуць у петыцыі пра беларускіх добраахвотнікаў ва Украіне.
Беларусы бароняць Украіну ў складзе палка Каліноўскага і іншых падраздзяленняў. У вайне ўжо загінулі некалькі беларусаў, якія ваявалі на баку Украіны.
Алесь Наваборскі belsat.eu
