Красавік прыносіць беларусам новыя змены. Сярод іх – рост ліміту паводле еўрапратаколу, базавы мабільны тарыф і некаторыя іншыя новаўвядзенні. А вось абяцанай уладамі формулы справядлівага цэнаўтварэння пакуль не відаць, чаго не скажаш пра анансаваны рост цэнаў.
Аляксандр Лукашэнка даручыў да 1 красавіка распрацаваць формулу справядлівага цэнаўтварэння, якая «не будзе ціснуць ні прадпрымальнікаў, вытворцаў, ні спажыўцоў». Пакуль жа ў красавіку намечаны толькі рост цэнаў.
Што падаражэе ў красавіку
З 1 красавіка на 5–30 капеек падаражэюць некаторыя віды цыгарэтаў «Карона», «Dove», «Pall Mall», «Esse», «Camel», «Kent», «Rothmans», «Lucky Strike», «Red Bor», «RB Perlamutr», «Rigins Original», а таксама «Richmond Compact Special Blue».
Таксама з 1 красавіка сетка электраладавальных станцыяў «Malanka» павысіць тарыфы на ладаванне электрамабіляў. Гэтак, 1 кВт⋅г павольнага ладавання падаражэе на 7 % да Br 0,46, хуткай – на 8,9 % да Br 0,61. Рэзерваванне канектара на 15 хвілінаў падаражэе на 5 % да Br 2,10. На хуткіх станцыях таксама ўводзіцца плата за карыстанне канектарам пасля завяршэння ладавання – Br 0,3 за хвіліну. Для бясплатнага адключэння ад станцыі даецца 20 хвілінаў.
З 1 красавіка на 5,7 % да Br 18,77 павялічыцца памер базавай арэнднай велічыні. На яе падставе вызначаецца памер арэнднай платы за нерухомасць у дзяржаўнай уласнасці, а таксама ва ўласнасці гаспадарчых таварыстваў з доляй дзяржавы больш як 50 %.
З 8 красавіка «Белтэлекам» павысіць шэраг тарыфаў для фізічных і юрыдычных асобаў. Абаненцкая плата за звычайны хатні тэлефон вырасце з Br 3,88 да Br 4,05 на месяц, кошт хвіліны мясцовага тэлефоннага злучэння падымуць з 0,8 да 0,85 капейкі. Хвіліна міжгародняй сувязі па Беларусі будзе каштаваць 2,2 капейкі замест 2,1.
Новыя камісіі ў банках
«Прыёрбанк» з 1 красавіка ўводзіць камісію за сэрвіснае абслугоўванне рахункаў фізічных асобаў у доларах, еўрах, злотых, фунтах стэрлінгаў, швейцарскіх франках і шведскіх кронах з балансам ад $ 30 тыс.у эквіваленце. Плата за абслугоўванне валютных рахункаў з сумарнаю сярэднядзённаю рэштай ад $ 30 тыс. да $ 50 тыс. складзе Br 500. Упершыню яе здымуць у траўні. Укладаў камісія не датычыць.
А кліенты «Альфа Банку» з 1 красавіка будуць плаціць па Br 20 за кожную спробу вярнуць грошы, калі пры пераводзе яны памыліліся ў рэквізітах. Новая камісія датычыць усіх безнаяўных пераводаў.
Адзіныя полісы аўтастрахавання
23 красавіка пачнецца продаж адзіных полісаў аўтастрахавання ў Беларусі і Расеі. Гэта дазволіць беларускім аўтаўладальнікам, якія заключылі такую дамову, не набываць дадатковай дамовы міжнароднага страхавання пры выездзе ў РФ. Заключыць яе можна будзе толькі ў электронным выглядзе.
Новы ліміт выплат паводле еўрапратаколу
З 23 красавіка ў Беларусі ў 2,2 разу павялічыцца ліміт выплатаў паводле еўрапратаколу пры афармленні ДТЗ без выкліку ДАІ: з сённяшніх 800 еўраў да 150 базавых велічыняў (Br 6,3 тыс.). Таксама прадугледжаныя выплаты пацярпелым у ДТЗ з удзелам дзікіх жывёлінаў.
Базавы тарыф мабільнай сувязі
З 1 красавіка з'явіцца базавы тарыф на мабільную сувязь. Падключыць яго можна будзе ў любога аператара. Кошт тарыфу складзе каля Br 12. На месяц паводле яго абанент атрымае 200 хвілінаў галасавога трафіку ўва ўсе сеткі Беларусі, 2 Гб трафіку перадачы даных і 50 СМС.
Адмена выпадковых падпісак на паслугі мабільных аператараў
З 1 красавіка таксама стануць немагчымыя несанкцыянаваныя падключэнні да мабільных сэрвісаў. Цяпер сотавыя аператары змогуць актываваць платныя паслугі, якія не ўваходзяць у тарыф, толькі пасля згоды абанента.
Новыя правілы паступлення ў школу і Ліцэй БДУ
У красавіку зменяцца падыходы да залічэння дзяцей у 1-ы клас, бо былі перагледжаныя межы ды замацаванні мікрараёнаў за школамі і гімназіямі. Да 10 красавіка на сайтах школаў зʼявіцца адмысловы раздзел «Арганізацыя прыёму ў 1-ыя класы».
Таксама змяняецца фармат паступлення ў Ліцэй БДУ. З гэтага часу да падачы ў прыёмную камісію дакументаў для паступлення абітурыент мусіць з 1 да 15 красавіка стварыць асабісты кабінет на сайце і зарэгістравацца ў ім. У электроннай заяве можна пазначыць два профілі меркаванага навучання, калі адно з уступных выпрабаванняў у іх агульнае.
Рэгістрацыя на ЦТ
З 9 да 22 красавіка адбудзецца рэгістрацыя для здачы цэнтралізаванага тэставання. Падаць заяўку можна онлайн на сайце Рэспубліканскага інстытуту кантролю ведаў або асабіста наведаць пункт правядзення ЦТ.
Вырасце дапамога на пахаванне
З 1 красавіка на 70 капеек павялічыцца памер дапамогі на пахаванне – да Br 2428,1. Велічыня дапамогі прывязаная да сярэдняга заробку за пазамінулы месяц.
Неабходна замяніць касы
Да 1 красавіка субʼектам гаспадарання неабходна было замяніць або абнавіць касавае абсталяванне. З 1 ліпеня за парушэнне парадку яго выкарыстання прадугледжаная адміністратыўная адказнасць.
Новыя правілы запаўнення транзітнай дэкларацыі
З 1 красавіка зменяцца форма і парадак запаўнення транзітнай дэкларацыі, унясення змяненняў у парадак запаўнення дэкларацыі на тавары, структура і фармат такіх дэкларацыяў, папярэдняй інфармацыі і дэкларацыі мытнага кошту, а таксама класіфікатары, што выкарыстоўваюцца для запаўнення мытных дакументаў. Таксама зменіцца парадак запаўнення, структура і фармат заявы пра выпуск тавараў да падачы дэкларацыі на тавары, зацверджаныя рашэннямі Калегіі ЕЭК за 14 студзеня 2025 года № 2 і № 3.
Новыя правілы аховы працы
З 1 красавіка набудуць моц новыя правілы аховы працы пры вытворчасці харчоў. Яны распаўсюджваюцца на ўсіх працадаўцаў незалежна ад формаў уласнасці. Правілы ўсталёўваюць агульныя патрабаванні пры размяшчэнні і эксплуатацыі абсталявання, арганізацыі працоўных месцаў, патрабаванні да электрабяспекі, мантажу (дэмантажу), рамонту і тэхнічнага абслугоўвання абсталявання, вытворчага працэсу. Яны датычаць вытворчасці цукру, кандытарскіх вырабаў, харчовых канцэнтратаў і пладоваагароднінных кансерваў, крухмалаў і крухмальнай прадукцыі, раслінных алеяў, дрожджаў, соладу, безалкагольных і алкагольных напояў.
Кантроль працы і адпачынку кіроўцаў
З 1 красавіка набудзе моц новае палажэнне аб працоўным часе і часе адпачынку кіроўцаў аўтамабіляў, тралейбусаў і трамваяў. Наймальнікаў абавязалі ўстанаўліваць парадак азнаямлення кіроўцаў з графікамі працы ў межах заканадаўства аб працы. Таксама вызначана, што ўключаецца ў працоўны час кіроўцы. А таксама, у якім выпадку мае месца час прастояў не з віны кіроўцы падчас працоўнага дня.
Забарона на продаж алівак
З 3 красавіка ў Беларусі забароненыя для ўвозу і рэалізацыі іспанскія аліўкі маркі «Gusto», начыненыя ласосем. Як заяўляецца, у іх знайшлі незаяўлены і недапушчальны пры вытворчасці алівак кансервант – дыаксід серы (Е220).
Новы пералік збору адходаў
З 1 красавіка абновіцца пералік тавараў і ўпакоўкі, на якія распаўсюджваюцца патрабаванні збору адходаў. Дакумент дапоўнены пунктамі пра пліты, лісты, плёнкі, стужкі, якія адносяцца да пакавальных матэрыялаў, пра пакрыцці для падлогі, сценаў і столяў з пластмасаў. Таксама ў пераліку пазначаныя аканіцы, гардзіны (у тым ліку венецыянскія жалюзі), будаўнічыя дэталі з пластмасаў, мацавальныя вырабы і фурнітура для мэблі, транспартавых сродкаў побытавага прызначэння, статуэткі і дэкаратыўныя вырабы, штучныя кветкі, прылады для ладавання акумулятараў, электронныя цыгарэты, электрычныя машыны з функцыямі перакладніка або слоўніка.
Доўгія выходныя
З нядзелі 27 красавіка да аўторка 29 красавіка беларусаў чакаюць доўгія выходныя ў звязку з Радаўніцай. Пры гэтым панядзелак 28 красавіка давядзецца адпрацаваць у суботу 26 красавіка.
Добраахвотна-прымусовы суботнік
12 красавіка ў Беларусі пройдзе рэспубліканскі суботнік. Акцэнт зробяць на добраўпарадкаванні памятных месцаў і вайсковых пахаванняў.
Новыя ўмовы ўезду ў зону адчужэння
З 1 красавіка пачне дзеяць новы парадак кантрольна-прапускнога рэжыму на тэрыторыях зоны адчужэння. Заяўку можна пакінуць падчас асабістага прыёму, перадаць праз курʼера, адправіць поштай і ў электроннай форме на Адзіным партале электронных паслуг. Яна павінна змяшчаць прозвішча, імя і імя па бацьку, дату нараджэння заяўніка і асобаў, якія ідуць з ім. Для юрыдычных асобаў і ІП трэба пазначыць яшчэ і пасаду, а калі заяўнік – замежнік, то звесткі пра ягонае грамадзянства і дакумент, які сведчыць асобу. Да таго ж спатрэбяцца звесткі пра марку, мадэль і рэгістрацыйныя знакі транспартавага сродку.
Забарона лавіць рыбу
З 1 красавіка ў Гарадзенскай, Менскай і Магілёўскай вобласцях пачне дзеяць забарона на ловы рыбы падчас нерасту. Яна будзе трываць да 30 траўня, у Віцебскай вобласці – з 10 красавіка да 8 чэрвеня. У перыяд нерасту забаронена займацца прамысловым рыбалоўствам, а аматарскае дапускаецца пры выкананні шэрагу ўмоваў.
Сезон рачных круізаў
З 12 красавіка адкрыецца сезон рачных круізаў. У плаванне адправяцца пасажыры цеплахода «Белая Русь». Асноўныя яго кліенты – турысты з Расеі.
Новыя рэйсы «Белавіі» ў Расею
«Белавія», якая з 30 сакавіка перайшла на вяснова-летні расклад палётаў, запускае шэраг новых рэйсаў у Расею. З 2 красавіка ў серады і суботы авіякампанія пачне лётаць маршрутам Берасце – Санкт-Пецярбург («Пулкава»), а з 28 красавіка ў панядзелкі і чацвяргі стартуюць рэйсы Магілёў – Масква («Шарамецьева»). Акрамя таго, з 28 красавіка ў аўторкі і суботы стартуюць рэйсы Менск – Махачкала.
Макар Мыш belsat.eu
