Раніцаю 31 сакавіка на палігоне ў Пабрадзе ратавальнікам удалося дастаць з балота амерыканскую браняваную машыну. На месцы здарэння працуюць вайсковая паліцыя і амерыканскія следчыя. Пакуль няма інфармацыі пра зніклых вайскоўцаў.
Ратавальную аперацыю правялі ўначы 31 сакавіка, паведамляе LRT.
«Аперацыя была завершана а 4:30, браняваную машыну дасталі з дапамогаю дзвюх аналагічных машынаў і бульдозера», – заявіла міністарка абароны Літвы Довіле Шакаліене.
Як паведаміла Камандаванне арміі ЗША ў Еўропе і Афрыцы, у нядзелю вадалазы замацавалі другі трос на браняванай машыне, якая затанула ў балоце. У панядзелак раніцай яе паспяхова дасталі. Паводле міністаркі абароны, у нядзелю ўвечары (а 22:00 паводле літоўскага часу) знайшлі пункт мацавання другога троса, праз гадзіну ён быў зафіксаваны, а каля 2:45 пачалася аперацыя пад’ёму. Працы цягнуліся амаль дзве гадзіны.
«Былі задзеяныя дзве машыны M88 і два дадатковыя бульдозеры для фіксацыі, бо наяўнай тэхнікі аказалася недастаткова. Цяпер на месцы працуюць амерыканскія следчыя і вайсковая паліцыя Літвы. Дадатковай інфармацыі пакуль перадаць не можам», – адзначыла Шакаліене.
,,«Звестак пра вайскоўцаў пакуль няма, але ў нас ёсць дакладная дамоўленасць, што першымі пра гэта паведамяць прадстаўнікі ЗША… Усе адчулі вялікую палёгку: самы складаны этап аперацыі пройдзены. Гэта быў першы і найцяжэйшы этап», – падкрэсліла міністарка.
Нагадаем, што амерыканскія вайскоўцы ў гусенічнай браняванай машыне M88 зніклі 25 сакавіка падчас вучэнняў на палігоне ў Пабрадзе. На наступны дзень стала вядома, што машына затанула ў балоце. Яе месцазнаходжанне вызначылі ў сераду, пасля чаго пачалася складаная аперацыя яе пад’ёму. Браняваная машына была на глыбіні 4 метраў, над ёю было 2 метры ілу. У нядзелю ўвечары амерыканскія вадалазы здолелі замацаваць на ёй тросы.
Раман Шавель belsat.eu
