«Элементы кіравання палком страцілі дзве асобы, якія намагаліся ператварыць полк у сваю ПВК».
Полк Каліноўскага 19 ліпеня выступіў з заявай пра рэформы і пра змену камандзіра. У сацсетках палка Каліноўскага 22 ліпеня з’явілася паведамленне аб тым, што полк «страчвае элементы самакіравання». «Белсат» спытаў, што адбываецца, у былога і дзейнага камандзіраў.
Былы камандзір палка Каліноўскага Дзяніс Прохараў (пазыўны Кіт) у пачатку ліпеня перадаў свае абавязкі Паўлу Шурмею (пазыўны Дзядзька), пазней пра гэта паведамілі ў відэа на сайце палка.
Прохараў у эфіры «Белсату» пацвердзіў, што рашэнне аб прызначэнні Шумрэя выканальнікам абавязкаў камандзіра прымаў ён. Паводле Прохарава, рашэнне ён ўзгадніў з «працоўнай групай палка Каліноўскага, дзе сабраны максімальны актыў усіх баявых падраздзяленняў, якія прымалі і прымаюць удзел у рэформе». Рашэнне было зацверджанае вайсковым кіраўніцтвам Украіны.
Дзяніс Прохараў таксама заявіў, што інфармацыя, якую распаўсюджваюць у Telegram-канале палка, «дэструктыўная», ёй можа скарыстацца вораг. Паводле яго, полк Каліноўскага «не мае дачынення» да гэтых заяваў, асноўны актыў палка Каліноўскага не рабіў такіх заяваў і не мае доступу да каналу.
Павел Шурмей расказаў, што ў палку даўно наспелі рэформы, якія нарэшце пачалі ў красавіку. Рэформы тычацца кіравання палком, празрыстасці і справаздачнасці адносна фінансавай і валанцёрскай дапамогі, рэкрутынгу, медыйнай працы і паляпшэння баяздольнасці падраздзялення. З гэтым, па словах Шурмея, былі згодныя не ўсе. Ён таксама кажа, што заява выйшла на Telegram-канале, які не кантраляваны палком (полк кантралюе толькі свае сайт і Facebook), і звяртае ўвагу на тое, што «афіцыйнае паведамленне» на канале не падпісанае: невядома, хто кажа ад імя палка.
,,«Хто кажа ад імя палка Каліноўскага аб тым, што полк страціў элементы самакіравання? Не, элементы кіравання палком імя Кастуся Каліноўскага страцілі дзве вядомыя асобы, Мікола і Ваніш, якія намагаліся ператварыць полк імя Кастуся Каліноўскага ў сваю ПВК», – заявіў Шурмей.
Паводле яго, Ваніш, які разам з жонкай кантралюе сацсеткі палка, і Мікола перакладваюць на вайсковую частку сваю адказнасць за палітыку ў апошнія два гады, праз якую з палка сыходзілі старыя ваяры і не прыходзілі новыя. І гэтым яны ствараюць канфлікт з вайсковай часткай.
На Ваніша (сапраўднае імя – Арцём Войніч) і Міколу (Мікалай Дземідзенка) раней неаднаразова скардзіліся былыя байцы палка (ды яны скардзіліся і на Прохарава). Былы баец палка Сяргей Бяспалаў 23 ліпеня апублікаваў відэа з абвінавачваннямі ў бок Войніча і Дземідзенкі: заяўляе, што толькі гэтыя два, якія яшчэ ў красавіку мусілі пайсці ў адстаўку, не падтрымалі прызначэнне Шурмея. Бяспалаў не ўпэўнены, што Войніча і Дземідзенку не ўдасца змяніць камандзіра на лаяльнага ім.
,,«Я б хацеў скарыстацца гэтым эфірам, каб беларусы былі ўпэўненыя, што полк Каліноўскага – ён ёсць, на дадзены момант з часовым выканальнікам абавязкаў камандзіра Дзядзькам, Паўлам Шурмеем, выконвае баявыя задачы, – сказаў Прохараў. – Канфліктаў з вайсковай часткай няма, ёсць пэўныя непаразуменні на шляху рэформаў. Але ўсё гэта – натуральныя рэчы, бо вайсковае падраздзяленне павінна расці. А рост – гэта заўсёды нейкія такія нюансы, хтосьці пагаджаецца, хтосьці не пагаджаецца».
Прохараў дадаў, што цяпер полк намагаецца «не выносіць смецце з хаты», а спачатку вырашыць, што рабіць і ў якім фармаце, і толькі потым расказаць канчатковае рашэнне. А «той бок» вырашыў «нахабным спосабам казаць такія штукі». Шурмей жа падкрэсліў, што рэформы палка скіраваныя на тое, каб «людзі, якіх лёс Беларусі ўжо не цікавіць, а цікавяць нейкія свае ўласныя інтарэсы, займаліся сваімі інтарэсамі, толькі не ў палку імя Кастуся Каліноўскага».
У красавіку 2024 года ў сацсетках палка на кароткі час з’явілася, а затым знікла паведамленне аб выключэнні Дземідзенкі з палка. Прохараў расказаў, што на той момант гэта было фактам, таму пра гэта і вырашылі расказаць, але затым пачаліся «ўнутраныя непаразуменні». Але пра далейшыя дэталі не расказаў, спаслаўшыся на незавершаныя рэформы.
«Белсат» не змог атрымаць каментары Арцёма Войніча і Міколы Дземідзенкі, запрашае іх выказаць сваю пазіцыю.
Вітаўт Сіўчык, Алесь Наваборскі belsat.eu
