Міністэрства аховы здароўя папярэдзіла адміністрацыю Лукашэнкі пра рызыкі і праблемы, звязаныя з прыездам у Беларусь пакістанцаў, піша «Наша ніва» са спасылкаю на дакументы, якія апынуліся ў «BELPOL».
Са звестак «BELPOL» вынікае, што намеснік міністра аховы здароўя, галоўная дзяржаўная санітарная доктарка Беларусі Святлана Нячай скіравала ў Адміністрацыю прэзідэнта аналітычную запіску. Там пералічаныя высокія эпідэмічныя рызыкі ў звязку з анансаваным Аляксандрам Лукашэнкам масавым уездам грамадзянаў Пакістану ў Беларусь.
Паводле запіскі, ёсць верагоднасць завозу ў Беларусь поліяміэліту, брушнога тыфу, адру, халеры, малярыі, ліхаманкі Дэнге, ліхаманкі Крым-Конга і ліхаманкі Чыкунгунья.
Каб пазбегчы праблемаў, Міністэрства аховы здароўя рэкамендуе абавязковае правядзенне лабараторных даследаванняў і вакцынацыі пакістанцаў за кошт дзяржаўнага бюджэту.
Паводле «BELPOL», медычны агляд і вакцынацыя аднаго працоўнага мігранта абыдзецца бюджэту ў 460 рублёў. Калі ў Беларусь прыедуць усе 150 тысячаў чалавек, як казаў Лукашэнка, то агулам на гэтыя мэты трэба будзе выдаць 69 мільёнаў рублёў. Таксама закуп вакцыны ў Расеі будзе каштаваць 300 тысячаў рублёў.
Раней Аляксандр Лукашэнка апавёў, што ў Беларусь плануюць запрасіць 150 тысячаў працоўных мігрантаў з Пакістану. Гэта адбылося на фоне дэфіцыту кадраў на беларускім рынку працы. Прапагандыст Ігар Тур на дзяржаўным тэлебачанні пасля гэтага пужаў беларусаў: можа аказацца, што дзесяць пакістанцаў заменяць ледзь не сто беларусаў, якія на працы нібыта толькі і робяць, што п'юць каву і размаўляюць з калегамі.
Арсен Рудэнка belsat.eu
