У канцы 2024 года ў Беларусі было 56,2 тысячы дактароў-спецыялістаў. Гэта на 400 больш, як было ў канцы 2023-га. Пры гэтым у краіне за год стала на пяць шпіталяў менш, а станцыяў хуткай дапамогі – на 31. Такія звесткі вынікаюць са свежага агляду Белстату да Дня медычнага работніка ў Беларусі і такога ж агляду за 2023 год.
З агульнай колькасці дактароў тых, хто практыкуе, у Беларусі 49,1 тысячы. Хоць дактароў стала крыху больш, колькасць сярэдніх медычных работнікаў скарацілася на 1,1 тысячы за год і склала 123,9 тысячы асобаў.
Колькасць амбулаторна-паліклінічных арганізацыяў таксама знізілася на 14. Іх засталося 2693. Шпіталяў у канцы 2024 года было 564 (на 5 менш, як у 2023 годзе), а станцыяў хуткай дапамогі – 86 (на 31 менш).
У сферы аховы здароўя ў Беларусі працуюць у асноўным жанчыны. Сярод дактароў іх у канцы 2024 года было 72,8 %, а сярод медычнага персаналу – 94,7 %.
Сярэдні ўзрост дактароў – 42,5 года, а медычных работнікаў – 43,4 года.
Таксама Белстат апавёў, што ў 2024 годзе былі праведзеныя 1153 аперацыі ў транспланталогіі (997 у 2023 годзе). З іх 352 былі ў транспланталогіі нырак, 91 – печані, 44 – сэрца.
Паведамляецца, што былі нададзеныя медычныя паслугі замежнікам са 157 краінаў, што на 10 больш, як у 2023 годзе. Найбольш у Беларусі лекаваліся людзі з Расеі, Казахстану, Латвіі, Сербіі і Кітаю.
Арсен Рудэнка belsat.eu
