Праваабаронцам «Вясны» вядома не менш за пяць выпадкаў, калі беларускія спецслужбы пісалі актывістам. Некаторым прапаноўваюць супрацу ў абмен на бяспеку родных у Беларусі.
Усе паведамленні зафіксаваныя з аднаго акаўнту ў Facebook – Maria Pulkovskay, якая нібыта з Прагі. Акаўнт мае 376 сяброў, сярод якіх ёсць былыя палітзняволеныя, журналісты і актывісты. Некаторым, з кім выходзяць на сувязь, абяцаюць бяспеку родных у Беларусі ў абмен на супрацу са спецслужбамі.
Адна з актывістак, з якой звязваўся супрацоўнік КДБ, апавяла «Вясне», як адбывалася камунікацыя. Яна адзначае, што ў КДБ ведаюць не проста імя таго, да каго звяртаюцца, але і імя па бацьку.
,,«То бок гэта ўжо інфармацыя, якая не ўва ўсіх змяшчаецца ў сацыяльных сетках. Ён сказаў, што яго мэта – даведацца меркаванне пра структуры і нейкія падзеі. Ён піша пра нейкі кампраміс, супрацу, спрабуе наладзіць узаемавыгадныя камунікацыі. Ён хоча даведацца больш інфармацыі пра нейкіх людзей з дэмакратычнай супольнасці», – кажа актывістка.
«Вясна» заклікае зрабіць захады ў справе лічбавай бяспекі:
- Пераглядзіце спіс сяброў у сацыяльных сетках – выдаліце невядомых або падазроных асобаў.
- Абмяжуйце бачнасць асабістай інфармацыі, асабліва той, якая можа прыцягнуць увагу да вас ці неяк нашкодзіць.
- Выдаліце або схавайце старыя допісы і каментары, якія могуць змяшчаць уразлівую інфармацыю.
- Будзьце пільныя да новых кантактаў, не адказвайце на паведамленні ад невядомых асобаў, асабліва калі яны задаюць палітычныя пытанні.
- Уключыце двухфактарную аўтэнтыфікацыю на ўсіх акаўнтах, дзе гэта магчыма.
- Захоўвайце ўзаемадзеянне з падобнымі паведамленнямі (як ад Maria Pulkovskay). Зрабіце скрыншоты, не адказвайце, паведаміце праваабаронцам @ViasnaSOS у Telegram.
- Выключыце функцыю «хто можа знайсці вас паводле нумару тэлефона» ў наладах Facebook ды іншых платформаў.
- Карыстайцеся VPN і шыфраванымі мэсэнджарамі (напрыклад, Signal).
Арсен Рудэнка belsat.eu
