Самы папулярны ў свеце карыстальнік «TikTok» Кабі Лямэ быў вымушаны пакінуць ЗША пасля таго, як яго затрымалі працаўнікі іміграцыйнай службы (ICE) у Лас-Вэгасе з падазрэннем, што ягоная віза пратэрмінаваная. Пра гэта паведамляе «Associated Press».
Кабі Лямэ затрымалі 6 чэрвеня ў аэрапорце, але яму дазволілі пакінуць краіну без загаду аб дэпартацыі, паведаміў прадстаўнік іміграцыйнай і мытнай службы ЗША.
Лямэ прыбыў у ЗША 30 красавіка і «пратэрмінаваў тэрмін дзеяння сваёй візы», паведаміў прадстаўнік ICE. Добраахвотны выезд дазваляе пазбегчы загаду аб дэпартацыі, які можа перашкодзіць людзям вярнуцца ў ЗША на тэрмін да дзесяці гадоў.
Затрыманне і добраахвотны ад'езд Лямэ з ЗША адбыліся на фоне ўзмацнення барацьбы з іміграцыяй, што праводзіць прэзідэнт ЗША Доналд Трамп. Сярод іншага, у краіне адбыліся рэйды працаўнікоў іміграцыйнай службы, што выклікала шматдзённыя пратэсты ў Лос-Анджэлесе і жорсткую рэакцыю сілавікоў на дэманстрацыі.
25-гадовы Кабі Лямэ праславіўся на ўвесь свет падчас пандэміі. У сваіх відэа ён паказваў рэакцыю на дзіўныя лайфхакі. Толькі на TikTok у яго больш за 162 мільёнаў падпісальнікаў.
Лямэ нарадзіўся ў Сенегале, пераехаў у Італію разам з бацькамі, калі быў дзіцем, мае італьянскае грамадзянства.
У 2022 годзе ён падпісаў шматгадовае партнёрства з дызайнерскім брэндам «Hugo Boss». У студзені ён быў прызначаны амбасадарам добрай волі UNICEF.
У ЗША ён наведаў дабрачынны баль «Met Gala» ў Нью-Ёрку.
Арсен Рудэнка belsat.eu
