За тыдзень да гэтага яго затрымлівалі сілавікі
30 траўня пайшоў з жыцця Уладзімір Крысёнак, аператар 6-ага разраду вытворчасці №3 ААТ «Нафтан». Яго знайшлі дома павешаным. За тыдзень да гэтага яго затрымлівалі сілавікі, паведамляе «Вясна».
Уладзімір Крысёнак далучыўся да агульнанацыянальнай стачкі восенню 2020 года. Ён быў кандыдатам на пасаду старшыні Беларускага незалежнага прафсаюза супрацоўнікаў «Нафтан» у 2021 годзе.
24 траўня Уладзімір быў затрыманы прадстаўнікамі сілавых структур і праз 72 гадзіны выпушчаны пад падпіску аб нявыездзе. Як мяркуюць знаёмыя Уладзіміра, прычынай затрымання магла паслужыць актывізацыя розных сілавых структур пасля нядаўняй публікацыі ў СМІ відэа, якое адлюстроўвае жудасны тэхнічны стан устаноўкі, на якой калісьці працаваў Уладзімір. Вядома, што сілавікі пагражалі яму 12 гадамі зняволення.
Нагадаем, што ў Беларусі працягваецца пераслед незалежных прафсаюзаў. 14 красавіка незалежны прафсаюз РЭП быў прызнаны экстрэмісцкім фармаваннем. 19 красавіка адбыўся ператрус у менскім офісе незалежнага прафсаюзу металістаў, на сябраў аб’яднання былі заведзеныя крымінальныя справы.
Раман Лугоўскі belsat.eu
