Пакуль улады Беларусі спадзяюцца на паляпшэнне стасункаў з Ватыканам, паляпшаць становішча вернікаў яны не збіраюцца. У прыватнасці, Чырвоны касцёл у Менску, зачынены ўладамі ў верасні 2022 года, абяцаюць аддаць толькі праз 1,5-2 гады.
Пробашч зачыненага касцёлу ксёндз Францішак Рудзь назваў меркаваны тэрмін «рэстаўрацыі» – паўтара-два гады. Пры гэтым дакладныя планы ўладаў адносна рамонтных працаў у касцёле невядомыя. Вернікі ж ужо скончылі вываз маёмасці са святыні, што ад іх патрабавалі ўлады нібы для пачатку рамонту, перадае Katolik.Life.
«Вельмі балюча і трывожна. Невядома, што будзе з касцёлам, на колькі зацягнецца «рэстаўрацыя»», – адзначаюць вернікі.
Паводле іх, дзеянні ўладаў – гэта «здзек і знявага», «здарылася найгоршае». «Апошняя надзея, што хаця б вернуць неўзабаве касцёл, рухнулі», – заяўляюць парафіяне.
Менск хоча палепшыць стасункі з Ватыканам
Тым часам улады краіны плануюць палепшыць стасункі з Ватыканам. Пра гэта 27 сакавіка заявіў Юрый Амбразевіч, прызначаны амбасадарам Беларусі пры Святым Прастоле.
Паводле яго, Беларусь, ствараючы сваю амбасаду ў Ватыкане, «зыходзіць з таго, што гэта дазволіць умацаваць нашы пазіцыі ў дзяржавах Лацінскай Амерыкі, Афрыкі, а таксама дазволіць умацаваць нашы пазіцыі ў дачыненні да працы з грамадскімі элітамі, дзяржаўнымі элітамі еўрапейскіх дзяржаў і дзяржаў Паўночнай Амерыкі ў той частцы, што каталіцкая рэлігія мае магчымасць уплываць на іх падыходы».
Чырвоны касцёл стаіць зачыненым пасля таямнічага пажару 26 верасня 2022 года, ад якога амаль нічога не пацярпела. У 2024-м быў звольнены і шматгадовы пробашч святыні ксёндз Уладзіслаў Завальнюк.
Для рамонту касцёлу не быў праведзены тэндар на пошук падрадчыка, а ў Інвестыцыйнай праграме Менску няма для гэтага фінансавання. Вернікі баяцца, што пасля рамонту парафію могуць выселіць або выставіць ёй дадатковыя фінансавыя патрабаванні – на сёння «Менская спадчына» налічыла парафіі доўг памерам 148 тысячаў рублёў.
Якуб Хруст belsat.eu
