Падчас імшы 22 снежня пробашч закрытага ўладамі Чырвонага касцёлу ў Менску ксёндз Франц Рудзь закрануў «далікатнае пытанне наконт сітуацыі на канец года».
Святар паведаміў, што доўг парафіі перад дзяржаўным прадпрыемствам «Спадчына» – уласнікам касцёлу складае 148 тысячаў рублёў, або 43 тысячы долараў.
«Гэты доўг я атрымаў, і гэта на нашай парафіі. На заканчэнне года няма з чаго асабліва падводзіць вынікі. Але тое, з чаго я з вамі распачынаю, такая вось сітуацыя. Молімся аб тым, каб мы маглі вярнуцца ў свой касцёл, і каб там парафія жыла, як гэта было ад пачатку», – сказаў святар, паведамляе «Katolik.life».
На думку выдання, выплата гэтай сумы можа быць адной з умоваў таго, каб вернікаў ізноў пусцілі ў Чырвоны касцёл.
У 2020 годзе супольнасці ўжо выстаўлялі патрабаванне аплаціць буйную суму – 156 тысячаў рублёў. Гэта абумоўлівалі «амартызацыяй» храму і падаткамі за карыстанне зямлёй. Тады ў парафіі ўважылі за неправамерныя такія патрабаванні і прасілі перадаць касцёл ва ўласнасць супольнасці. Аднак гэтага не адбылося. У курыі архідыяцэзіі назвалі выплаты непад’ёмнымі і несправядлівымі, бо касцёл «быў пабудаваны католікамі і павінен ім па праве належаць».
Чырвоны касцёл застаецца зачыненым з 26 верасня 2022 года, калі пасля дзіўнага пажару, што амаль нічога не пашкодзіў, улады заявілі, што ён патрабуе тэрміновага рамонту і небяспечны для наведвання. У 2024 годзе быў звольнены шматгадовы пробашч касцёлу Уладзіслаў Завальнюк – гэта таксама называлася адной з умоваў адкрыцця святыні для вернікаў.
Таксама глядзіце ў сюжэце:
Якуб Хруст belsat.eu
