Яе абвінавацілі ў арганізацыі і падрыхтоўцы дзеянняў, якія груба парушаюць грамадскі парадак
13 чэрвеня суд Рэчыцкага раёна вынес прысуд мясцовай жыхарцы Ганне Васільевай. Яе абвінавацілі ў арганізацыі і падрыхтоўцы дзеянняў, якія груба парушаюць грамадскі парадак (ч.1 арт. 342 КК). Жанчыну асудзілі да двух гадоў «хіміі», паведамляе «Палеская Вясна».
Матэрыялы справы дзівосным чынам раскрылі сутнасць «злачынства» Ганны Васільевай. Паводле абвінавачання, жанчына, «з мэтай публічнага выказвання незаконнымі спосабамі сваіх грамадска-палітычных поглядаў і пратэсту супраць ходу і вынікаў выбараў Прэзідэнта Рэспублікі Беларусь 9 жніўня 2020 года сумесна і ўзгоднена з іншымі асобамі ў працэсе несанкцыянаванага масавага мерапрыемства прыняла актыўны ўдзел у групавых дзеяннях, груба парушаючы грамадскі парадак, выйшаўшы на дарогу ў Рэчыцы, далучылася да іншых асоб, і актыўна перашкаджала руху службовага аўтамабіля АУС Рэчыцкага райвыканкама, выкарыстоўваючы дзіцячы вазок, змушаючы яго спыніць рух і ў далейшым змяніць маршрут руху, пры гэтым аказваючы відавочнае непадпарадкаванне законным патрабаванням супрацоўнікам АУС аб спыненні грубага парушэння грамадскага парадку».
Суд прызнаў Ганну Васільеву вінаватай. Паводле ч. 1 арт. 342 КК ёй прызначана пакаранне ў выглядзе абмежавання волі на тэрмін два гады без накіравання ў папраўчую ўстанову адкрытага тыпу.
Нагадаем, што па стане на 20 чэрвеня ў Беларусі прызнаныя палітычнымі вязнямі 1223 чалавекі.
Раман Лугоўскі belsat.eu
