У калоніі № 4 Гомля ўтрымліваецца палітзняволеная з разладам аўтычнага спектру Вольга Іванчанка. Яе пакаралі двума гадамі пазбаўлення волі за «паклёп» і «знявагу» Аляксандра Лукашэнкі. Былая зняволеная калоніі распавяла праекту «Палітвязынка» пра тое, як Вольга жыве за кратамі.
Вольгу Іванчанку пакаралі за каментары і «тэкст з выявай, які змяшчае загадзя ілжывыя выдумкі, якія ганяць Аляксандра Лукашэнку, зневажаюць ягоныя гонар і годнасць, накіраваныя на падрыў ягонага аўтарытэту і фармаванне негатыўнага вобразу», на старонцы ў «Одноклассниках».
«У Волі паводзіны малой дзяўчынкі, гадоў шасці. Яна вельмі сарамлівая, – кажа былая зняволеная Мілана (імя змененае). – З ейных паводзінаў зразумела, што ў яе ёсць разлад аўтычнага спектру. Яна вельмі сарамлівая, літаральна як дзіця. Воля не можа гаварыць з людзьмі. Зусім. Калі яна з чалавекам больш-менш збліжаецца, яна з чалавекам не гаворыць, а шэпча.
Ёй было вельмі цяжка, асабліва на праверках. Калі да яе звярталіся работнікі калоніі, Волі трэба было гучна і выразна назваць свае звесткі. Але яна шаптала ціха. І на яе крычалі, пыталіся: яна што – язык праглынула».
Аднойчы супрацоўніца калоніі спытала Вольгу, чаму яна так адказвае. Іншыя зняволеныя ёй патлумачылі, што ў Вольгі разлад аўтычнага спектру.
«Працаўніца не паверыла і сказала, што з такім дыягназам не саджаюць людзей у калонію. На наступны дзень ёй, мабыць, пацвердзілі дыягназ, таму супрацоўніца калоніі дазволіла Волі на праверцы проста ківаць», – распавядае Мілана.
Суд над Вольгай прайшоў 21 сакавіка 2023 года. Яе судзіла Наталля Ясенка.
Арсен Рудэнка belsat.eu