Сяргей Пятрухін: «У мяне была інфармацыя, што супраць Старавойтава ўзбудзілі крымінальную справу. І што ён налажыў на сябе рукі»
На былога начальніка ПК-3 «Віцьба» Аляксея Старавойтава, якога знайшлі памерлым, была заведзеная крымінальная справа, паведаміў «Белсату» былы палітвязень Сяргей Пятрухін са спасылкай на свае крыніцы. Старавойтаў нібыта павесіўся і гэта звязана з нелегальнымі схемамі, якія пануюць у беларускіх месцах зняволення, лічыць Пятрухін.
Сяргей Пятрухін быў у «Віцьбе», калі ёю кіраваў Старавойтаў.
«Я ведаў ужо некалькі дзён, што яго няма. Проста што не было афіцыйных пацверджанняў. І таксама ў мяне была інфармацыя, што супраць Старавойтава ўзбудзілі крымінальную справу. І што ён налажыў на сябе рукі, нібыта павесіўся. Гэта яшчэ не пацвердзілася, але вельмі падобна на праўду, таму што ён быў вельмі здаровым чалавекам, яму было 47 гадоў», – кажа былы палітвязень.
Афіцыйная прычына смерці Старавойтава не паведамляецца.
«Ён усе жыццё праслужыў у гэтай сістэме і вельмі баяўся зонаў. Яны катуюць людзей і бачаць, да якога скоцкага стану даводзяць іх. А ён пры мне быў палкоўнікам. І каб так яго на пенсіі пасадзілі ў турму – ён вельмі баяўся», – кажа Пятрухін. – І я яшчэ чуў раней, чым пра яго смерць, што следчыя органы зацікавіліся Дзідусам – начальнікам «промкі» [прамысловая зона, дзе працуюць асуджаныя. – Рэд.]», – працягвае Сяргей Пятрухін.
Віталь Дзідус пазначаны на сайце пошуку вакансіяў, як намеснік начальніка філіялу РУП «Віцьба», на якую працуюць зняволеныя.
«З некім не падзяліліся»
«На мой погляд, відавочна, што яны парушалі закон. Напрыклад, я ведаю, што нельга, каб зэкі выконвалі працу па рамонце лагера, рэмантавалі дахі. Але… прыязджалі машыны цывільныя – прадпрымальнікаў ці каго, з рэкламамі на бартах. Прывозілі будаўнічыя матэрыялы і там пастаянна шлі нейкія працы па рамонце. Гэта ўсё рабілі зэкі. Гэта не пацверджаная інфармацыя, але я кажу тое, што я бачыў, бо я не дурны. Я ўпэўнены, што яны афармлялі гэта на прадпрымальнікаў, а зэкі працавалі. Ім за гэта, канешне, не плацілі, акрамя званкоў і турэмных нішцякоў», – расказвае Пятрухін.
Відаць, Старавойтаў і Дзідус «з некім не падзяліліся», мяркуе суразмоўца. Патэнцыйных нелегальных схемаў узбагачэння ў калоніі шмат, асабліва «прыбытковай» можа быць дрэваапрацоўка і метал, які зняволеныя выцягваюць з правадоў.
«Рабілі нейкія рэчы налева з дрэва – мне зэкі казалі, што ціхенька вывозяць. Яны рабілі рукамі зэкаў шчэпу для кастроў. Мы калі яе рабілі, чулі, што Еўразвяз прапускае гэта. Нейкімі схемамі я маю на ўвазе. Там 5 еўра каштуе гэты пачак.
Я працаваў на дратах. Іх таксама можна было заганяць. Там жа медзь з правадоў. Гэта ім усе звозяць, кажуць, нават з Чарнобылю. Там гэтых дратоў процьма. Калі фуру здаць, можна падняць некалькі тысячаў долараў, а адсачыць аб’емы, якія павінны заставацца, складана.
Яны ніколі не давалі чэкаў у краме, ніколі, а цэны на ўсе прадукты былі падвышаныя. Гэта першая прыкмета таго, што нешта не тое. Я проста не мог пра гэта запытацца, бо не хацеў, каб на мяне абрушыўся гнеў. Усё адно чэк мне б не далі, а пасадзілі б у ШЫЗА. Там шмат такіх схем. Дзідус, начальнік прамысловай зоны, не мог сам, без ведама начальніка калоніі, штосьці рабіць. Толькі з дазволу», – кажа суразмоўца.
Калонія «Віцьба-3» – вельмі цяжкае месца, асабліва для палітвязняў. Менавіта там загінулі палітвязні Вадзім Храсько і Мікалай Клімовіч. Сяргей Пятрухін выйшаў адтуль 17 снежня 2022 года. Ён быў асуджаны на тры гады па палітычных матывах.
Аляксей Старавойтаў працаваў у «Віцьбе» з 1998 года. Прыкладна з траўня 2023 года скончыў працу ў калоніі.
Фота вокладкі: Белсат
Арсен Рудэнка belsat.eu
