Магілёўскія праваабаронцы «Mayday» паведамілі 23 лютага пра смерць 47-гадовага былога начальніка калоніі № 3 «Віцьба» Аляксея Старавойтава. Прычынаў смерці не называюць.
Праваабаронцы адзначаюць, што да выбараў 2020 года калонія «Віцьба» уважалася за «адну з найлепшых» у Беларусі, туды садзілі бізнесоўцаў, чыноўнікаў, сілавікоў і суддзяў. Але са з’яўленнем палітвязняў сітуацыя змянілася: зняволеных пачалі адпраўляць у штрафныя ізалятары з надуманых прычынаў, стваралі там нялюдскія ўмовы, чынілі прэсінг на тых, хто кантактаваў з палітвязнямі, а палітвязняў прымушалі пісаць «прашэнні аб памілаванні».
У калоніі ў ноч з 8 на 9 студзеня памёр 50-гадовы палітвязень Вадзім Храсько. У пачатку траўня 2023 года таксама ў «Віцьбе» памёр 61-гадовы палітвязень Мікалай Клімовіч.
Аляксей Старавойтаў працаваў у «Віцьбе» з 1998 года, прыйшоў на працу кантралёрам, даслужыўся да начальніка, кіраваў калоніяй каля пяці гадоў. Калоніяй цяпер кіруе 47-гадовы Філіп Стурчанка. Прыкладна з траўня 2023 года ён замяніў Старавойтава. Паводле праваабаронцаў, звальненне Старавойтава не было звязанае са смерцю палітвязня Клімовіча.
Як расказваў праваабаронцам былы палітвязень, беспасярэднюю адказнасць за ўсе здзекі нясуць пяцёра іншых начальнікаў: намеснік рэжымна-аператыўнай працы Дзяніс Федчанка, начальнік аператыўнага аддзелу маёр Сяргей Голубеў, аператыўныя супрацоўнікі і старшыя лейтэнанты Уладзіслаў Спірыдонаў, Антон Салаўёў і Раман Цярэшка. Пры гэтым менавіта Федчанка курыруе ўсіх палітычных вязняў і асабіста дае ўказанні, каго і як пакараць.
Алесь Наваборскі belsat.eu