Кіберпартызаны прызналі сваю датычнасць да ўзлому сайту КДБ яшчэ ўвосень 2023 года. Пра гэта ўдзельнікі кібергрупоўкі напісалі ў сваім тэлеграм-акаўнце.
«Афіцыйны сайт КДБ РБ не працуе ўжо больш за 2 месяцы. А ўсё таму, што кіберпартызаны прабраліся туды яшчэ ўвосень 2023 года і выпампавалі ўсю даступную інфармацыю. Працягваем жахаць па дыктатуры», – гаворыцца ў паведамленні.
Для пацвярджэння сваіх дзеянняў кіберпартызаны выклалі спіс адміністратараў сайту Камітэту дзяржбяспекі, а таксама базу звестак сайту і логі серверу.
Як трапна пракаментаваў гэты выпадак палітычны аглядальнік і гісторык Аляксандр Фрыдман, «у КДБ Беларусі ўмеюць правільна расстаўляць прыярытэты і эканоміць рэсурсы: камітэтчыкам удалося, паводле Івана Церцеля, перадухіліць атакі баявымі дронамі з натаўскай Літвы, але не ўдалося запусціць уласнага сайту, на які здзейснілі атаку кіберпартызаны».
Раман Шавель belsat.eu
