Яшчэ адна ахвяра ракетнага ўдару па Краматорску: у шпіталі памерла пісьменніца Вікторыя Амэліна
Стала вядома пра яшчэ адну ахвяру расейскага ракетнага ўдару па цэнтры Краматорску. У шпіталі памерла ўкраінская пісьменніца Вікторыя Амэліна. Аб смерці пісьменніцы паведаміў Украінскі ПЭН.
3 ліпеня стала вядома, што ад цяжкіх раненняў, атрыманых падчас расейскага ракетнага ўдару па рэстаране ў Краматорску, 1 ліпеня памерла ўкраінская пісьменніца Вікторыя Амэліна. У дзень нападу яна вячэрала ў рэстаране «Ria Lounge» з дэлегацыяй калумбійскіх журналістаў і пісьменнікаў. Нягледзячы на намаганні лекараў, яе не ўдалося выратаваць.
«З вялікім болем паведамляем, што 1 ліпеня ў лякарні Мечнікава ў Дняпры перастала біцца сэрца пісьменніцы Вікторыі Амэлінай. Яе жыццё абарвалася ў выніку ранення, несумяшчальнага з жыццём, выкліканага ракетным ударам расейскіх акупантаў па рэстаране ў Краматорску 27 чэрвеня 2023 года. Мы паведамляем гэтую навіну цяпер, калі пра яе даведаліся ўсе родныя Вікторыі і з іхнай згоды», – гаворыцца ў паведамленні Украінскага ПЭНу.
Чалец Украінскага ПЭНу, пісьменніца Вікторыя Амэліна пасля поўнамаштабнага расейскага вайсковага ўварвання далучылася да праваабарончай дзейнасці, была дакументатарам ваенных злачынстваў у арганізацыі «Truth Hounds», была ў Краматорску разам з дэлегацыяй калумбійскіх журналістаў і пісьменнікаў. Ад удару расейскай ракеты атрымала цяжкія раненні, якія аказаліся смяротнымі.
На аснове праведзеных апытанняў сведак трагедыі Украінскі ПЭН і «Truth Hounds» заяўляюць, што траплянне ракеты ў рэстаран не было выпадковым і ёсць чарговым ваенным злачынствам Расеі.
«Аналіз разбурэнняў і паказанняў сведак паказвае на тое, што расейцы выкарысталі для ўдару высокадакладную ракету тыпу “Іскандэр”. Яны дакладна ведалі, што страляюць у месца, дзе будзе вялікая колькасць цывільных людзей. Вядома аб гібелі 13 чалавек, каля 60 параненыя», – паведамляе ПЭН.
Вікторыя летам 2022 года далучылася да праваабарончай арганізацыі «Truth Hounds», разам з камандай дакументавала ваенныя злачынствы на дэакупаваных тэрыторыях на ўсходзе, поўдні і поўначы Украіны. У Капытолаўцы на Ізюмшчыне Вікторыя знайшла дзённік забітага расейскімі вайскоўцамі пісьменніка Уладзіміра Вакуленкі.
Перад смерцю Вікторыя працавала над кнігай нон-фікшн на англійскай мове «War, Justice Diary: Looking at Women Looking at War» пра ўкраінскіх жанчын, якія дакументуюць ваенныя злачынствы, і іхнае жыцці падчас вайны. Кніга неўзабаве павінна выйсці за мяжой.
Вікторыя Амэліна нарадзілася 1 студзеня 1986 года ў Львове. У 2007 годзе атрымала ў Львоўскай палітэхніцы ступень магістра кампʼютарных тэхналогіяў з адзнакай. У 2005–2015 гадах працавала ў міжнародных тэхналагічных кампаніях. У 2015 годзе Вікторыя прыпыніла карʼеру ў інфармацыйных тэхналогіях, каб прысвяціць сябе пісьменніцкай працы.
Яна аўтарка кніг «Сіндром лістападу, або Homo Compatiens», «Хтось, або Вадзяное Сэрца», «Дом для Дома» і «Э-э-эсторыі экскаватара Экі».
Творы пісьменніцы публікаваліся ў перакладах на польскую, чэшскую, нямецкую, нідэрландскую, англійскую і іспанскую мовы. Таксама яна заснавала Нью-Ёркскі літаратурны фестываль у Данецкай вобласці.
Як паведамляў «Белсат», 27 чэрвеня расейскія войскі нанеслі па цэнтры Краматорску ракетны ўдар, ад якога пацярпелі больш за 60 чалавек, 13 – загінулі. Сярод загінулых тры няпоўнагадовыя дзяўчыны – адна 17 гадоў і сёстры-блізняты 14 гадоў. Сярод параненых – дзевяцімесячнае немаўля.
Антон Тачняк belsat.eu
