Праваабаронцам стала вядома пра чарговы прысуд за каментары па «справе Зэльцэра». У Менскім гарадскім судзе 25 лістапада вынесены прысуд студэнту юрыдычнага факультэту БДУ, палітзняволенаму Уладзіміру Запольскіх. Аб гэтым паведамляе «Вясна».
27 лістапада праваабаронцам стала вядома, што 25 лістапада вынесены прысуд палітзняволенаму Уладзіміру Запольскіх, студэнту юрыдычнага факультэту БДУ. Справа слухалася у Менскім гарадскім судзе. Суд праходзіў тры дні ў закрытым рэжыме. Судовы працэс вяла суддзя Святлана Бандарэнка.
Юнака абвінавацілі ў распальванні іншай сацыяльнай варожасці” (ч.1 арт. 130 Крымінальнага кодэкса), арганізацыі і падрыхтоўцы дзеянняў, якія груба парушаюць грамадскі парадак, альбо актыўным ўдзеле ў іх (ч. 1 арт 342 Крымінальнага кодэкса) і абразе прадстаўніка ўлады (арт.369 Крымінальнага кодэкса).
Суд пастанавіў прызнаць Уладзіміра Запольскіх вінаватым і асудзіў да пазбаўлення волі ў калоніі ва ўмовах агульнага рэжыму тэрмінам на два гады, а таксама штрафу ў памеры 200 базавых велічынь.
22-гадовы студэнт быў затрыманы 29 верасня 2021 года па крымінальнай справе, узбуджанай за каментары ў Інтэрнэце пасля гібелі супрацоўніка КДБ Дзмітрыя Федасюка і it-спецыяліста Андрэя Зэльцэра. Утрымліваўся да суда ў СІЗА №1 у Мінску.
Антон Тачняк belsat.eu
