На аэрадроме Мачулішчы пад Менскам сёння прагрымелі тры выбухі, піша «Беларусь за МКАДам» са спасылкаю на відавочцаў. Паведамляецца пра актыўнасць у гэтым раёне міліцыянтаў і вайскоўцаў. Telegram-канал «МотолькоПомоги» пацвярджае інфармацыю пра два выбухі. Ініцыятыва «ByPol» паведамляе пра пашкоджанне расейскага вайскова-транспартнага самалёта.
Паводле неафіцыйных звестак, першы выбух, які быў моцны, адбыўся ўначы і яшчэ два меншай магутнасці – раніцай.
«У бок аэрадрому паехалі Следчы камітэт, стаяць вайскоўцы, аўтаматчыкі і хуткая», – кажуць відавочцы.
Пры гэтым Telegram-канал «МотолькоПомоги» піша, што атрымаў інфармацыю пра два выбухі.
Паведамляецца таксама, што ў некаторых месцах вакол аэрадрому інспектары ДАІ спыняюць аўтамабілі і правяраюць дакументы ў кіроўцаў і багажнікі, быў заўважаны рух МАЗаў унутраных войскаў да аэрадрому.
«Палова Мачулішчаў ачэпленыя. Усюды куча вайскоўцаў. Мы бачылі 5 машын вайскоўцаў з аўтаматамі. Усе машыны і маршруткі спыняюць, правяраюць торбы і багажнікі», – пішуць мясцовыя жыхары.
Ініцыятыва «ByPol», спасылаючыся на ўдзельнікаў плана «Перамога», паведамляе пра два выбухі, у выніку якіх быў пашкоджаны расейскі вайскова-транспартны самалёт і снегаўборачная тэхніка.
На аэрадроме ў Мачулішчах знаходзіцца расейская авіяцыя, пасля кожнага ўзлёту адтуль знішчальнікаў ва Украіне абвяшчаюць паветраную трывогу.
Сяргей Крот belsat.eu