Польскае МЗС: выдача гуманітарных візаў на тэрыторыі Польшчы вядзецца па агульных правілах
Выдача гуманітарных візаў на тэрыторыі Польшчы вядзецца па такіх жа правілах, як і ў Беларусі і любой іншай краіне. Гэта значыць, што дакументы павінны адпавядаць пэўным патрабаванням і выключэнняў няма. Аб гэтым «Белсату» паведамілі ў МЗС Польшчы.
Міністэрства замежных спраў Польшчы пракаментавала выпадкі, калі ў візавым цэнтры «VFS Global» адмаўляліся прымаць дакументы беларусаў, у якіх ёсць праблемы з пашпартамі. МЗС падкрэсліла, што ніякіх адыходжанняў ад агульных патрабаванняў не прадугледжвалася: «Увядзенне магчымасці выдачы гуманітарных віз у Польшчы не прадугледжвала адыходу ад агульных правілаў, якім павінен адпавядаць праязны дакумент, каб заяўка на візу была прынятая».
«Такія змены не былі прадугледжаны адпаведнымі палажэннямі. Гэтыя правілы, выкладзеныя ў Законе аб іншаземцах, засталіся нязменнымі і распаўсюджваюцца на ўсіх заяўнікаў на візу, у тым ліку на грамадзян Беларусі, незалежна ад месца падачы заявы на візу (Польшча ці іншыя краіны)», – паведамілі ў МЗС Польшчы.
Як раней паведамляў «Белсат», вядомыя выпадкі, калі ў беларусаў не прымаюць дакументы на выдачу гуманітарных візаў на тэрыторыі Польшчы. Самыя распаўсюджаныя праблемы: не хапае чыстых старонак у раздзеле для візаў і тэрмін дзеяння пашпарта заканчваецца раней чым за тры месяцы да тэрміну, на які б маглі выдаць візу. У аднаго з герояў публікацыі была адна чыстая старонка пашпарту ў разделе для візаў і чатыры старонкі ў раздзеле для іншых адзнак, але такі пашпарт не падыйшоў. У іншым выпадку ў падаўцы на гуманітарную візу пашпарт заканчваўся раней чым за тры месяцы да заканчэння магчымай візы.
У сваім ранейшым каментары МЗС Польшчы падрабязна расказала аб патрабаваннях да пашпарту падаўцы на гуманітарную візу. Згодна з арт. 77 сек. 5 польскага Закону аб замежніках ад 12 снежня 2013 года, праязны дакумент (звычайна пашпарт) замежніка пры падачы пры падачы заявы на візу павінен адпавядаць наступным крытэрыям:
- тэрмін яго дзеяння павінен заканчвацца не раней як праз 3 месяцы пасля заканчэння тэрміну дзеяння візы, на якую прэтэндуе заяўнік;
- павінны змяшчаць не менш за дзве пустыя старонкі;
- павінны быць выдадзены цягам апошніх 10 гадоў з даты падачы заявы на візу.
Згодна з арт. 77 сек. 6 закону, у тэрміновых выпадках, абгрунтаваных інтарэсамі замежніка, можна прыняць праязны дакумент, тэрмін дзеяння якога будзе менш за 3 месяцы з моманту заканчэння тэрміну дзеяння візы.
Антон Тачняк belsat.eu
