Назіральная рада марафону «Нам не ўсё адно» назвала канчатковую суму сабраных для палітвязняў сродкаў
На трэцім паседжанні Назіральнай рады марафону дапамогі палітвязням і іхным сем’ям «Нам не ўсё адно!» прадстаўніца Аб’яднанага пераходнага кабінету па сацыяльных пытаннях Вольга Гарбунова і ейныя калегі распавялі, колькі засталося грошай з агульнай сабранай сумы пасля выплаты банкаўскіх камісіяў, і куды яны пойдуць.
Пасля выплаты банкаўскай камісіі (2,9%) на рахунак фонду «21 траўня» паступіла амаль €546 тысяч. Таксама была прададзеная крыптавалюта (але пакуль не выведзеная) на крыху больш, чым €11 тысяч. Акрамя гэтых сумаў, на рахункі будзе пералічана яшчэ крыху больш за тысячу еўра.
Каманда фонду «21 траўня» пачала складаць дамовы для перадачы грошай у 12 арганізацыяў, якія зоймуцца непасрэдна дапамогай палітвязням і іхным сем’ям. Фонд спартовай салідарнасці заявіў, што не будзе прымаць удзел у размеркаванні сродкаў.
Асноўныя кірункі дапамогі, на якія пойдуць грошы:
- перадачы ў месцы зняволення,
- медычная дапамога (лекі, аперацыі),
- аплата адвакатаў,
- дапамога сем’ям палітвязняў.
Онлайн-марафон салідарнасці з беларускімі палітычнымі зняволенымі «Нам не ўсё адно» прайшоў 29-30 ліпеня. Акцыю зладзілі больш за 20 незалежных медыяў, у тым ліку «Белсат». Гасцямі супольнага эфіру сталі беларускія палітыкі і актывісты, спартоўцы, музыкі і творцы.
Марыя Міхалевіч belsat.eu
