Паводле крыніц выдання «Daіly Mail» і аналітыка Хрыста Грозэва ў расейскім ФСБ пачаліся чысткі. Імаверная прычына – некарэктныя звесткі аб унутранай сітуацыі ва Украіне напярэдадні ўварвання, следствам чаго стаў поўны правал «пуцінскага бліцкрыгу». Паводле выдання, ад працы адхілеілі ўжо каля 150 супрацаўнікоў спецслужбы, а краўніка аддзелу вонкавай выведкі ФСБ РФ Сяргея Бяседу ўзялі пад варту.
Аналітыкі мяркуюць, што Пуцін пачаў паляванне на здраднікаў пасля таго, як агенты заходняй выведкі атрымалі баявыя планы Расеі перад уварваннем. Магчыма, Пуцін шукае вінаватых у тым, што расейскі націск не прывёў да чаканай хуткай перамогі. Учора ўвечары стала вядома, што генерал-палкоўнік Сяргей Бяседа, начальнік аддзелу вонкавай выведкі ФСБ, пасля хатняга арышту быў пераведзены ў маскоўскі СІЗА строгага рэжыму Лефортава. Гэтую інфармацыю пацвердзіў і супрацоўнік міжнароднага праекту «Bellingcat» Хрыста Грозэў і іншыя крыніцы.
Афіцыйна ў дачыненні 68-гадовага Бяседы працягваецца следства ў «справе аб крадзяжах». Аднак паводле звестак незалежных журналістаў Пуцін падазрае яго ў перадачы замежнай выведцы падрабязнай інфармацыі аб рыхтаванні ўварвання ва Украіну.
Іншыя супрацоўнікі ФСБ былі затрыманыя нібыта за тое, што яны падалі справаздачы, у якіх пераканалі Пуціна, быццам расейскіх вайскоўцаў будуць вітаць як вызваляльнікаў, а ўкраінскія сілы не будуць надаваць супраціву.
Нагадаем, што за некалькі гадзінаў да таго, як войскі РФ уварваліся на тэрыторыю Украіны, брытанскае Міністэрства абароны апублікавала падрабязныя мапы з маршрутамі расейскіх бранятанкавых калонаў, што дазволіла ЗСУ арганізаваць эфектыўную абарону.
Паводле «Daily Mail» афіцэры выведкі Вялікай Брытаніі і ЗША перадавалі ўкраінцам дакладную інфармацыю аб планах Расеі. Яны таксама дапамаглі Украіне зліквідаваць генералаў і старэйшых афіцэраў расейскай арміі. Цяпер, калі РФ зазнае няўдачы, Пуцін пачаў «чысткі» ад тых, каго ён лічыць адказным.
ЗХ belsat.eu