Прэзідэнт Літвы Гітанас Наўседа ў інтэрв’ю тэлеканалу LNK заявіў, што ўладам краіны варта зноў вярнуцца да ўвядзення аднолькавых абмежаванняў у дачыненні грамадзянаў Беларусі і Расеі. Нагода для такіх словаў – прыбыццё ў Беларусь расейскіх наймітаў з ПВК Вагнэра.
Паводле Гітанаса Наўседы, праз розны падыход да беларусаў і расейцаў існуе рызыка з’яўлення на межах Літвы вагнэраўцаў з беларускім грамадзянствам, якіх могуць выкарыстаць «для якіх-небудзь зламысных мэтаў».
«Прэзідэнт наклаў вета на закон, пастанавіўшы і сказаўшы, што мы павінны ўжываць аднолькавы прававы рэжым да тых, хто прыбывае з Расеі і Беларусі. Я б сказаў, што кіроўная большасць зларадна адхіліла гэтае вета – ну, цяпер яны стаяць ля разбітага карыта«, – сказаў прэзідэнт, піша «DELFI».
Наўседа заявіў, што ў найбліжэйшы час давядзецца вярнуцца да пытання ўраўноўвання прававога рэжыму ў дачыненні расейцаў і беларусаў:
«Я не палохаю, я проста прапаноўваю вельмі добра падумаць, у якой сітуацыі мы цяпер».
У красавіку Наўседа адхіліў законапраект аб абмежаваннях для беларусаў і расейцаў, паводле якога грамадзяне Беларусі і Расеі павінны былі мець у Літве розныя абмежаванні. Кіраўнік Літвы не бачыць розніцы паміж грамадзянамі дзвюх краінаў і ўпэўнены, што санкцыі мусяць быць аднолькавымі. Больш за тое, ён прапанаваў спрасціць працэдуру анулявання выдадзеных нацыянальных візаў і дазволаў на часовы або сталы побыт.
Аднак Сейм Літвы адхіліў вета і ўхваліў дакумент.
Якуб Хруст belsat.eu