У ноч на чацвер, 4 красавіка, расейскія войскі атакавалі Харкаў. Дроны «Shahed» трапілі ў жылыя дамы, часткова разбураны шматпавярховік, ёсць загінулыя.
У выніку расейскай атакі ў Харкаве прагрымелі выбухі, адзначыў мэр гораду Ігар Тэрэхаў. «Суспільне. Харкаў» інфармуе, што выбухаў было сама меней чатыры.
Варожыя дроны заляцелі на Харкаўшчыну з Белгародскай вобласці РФ, заявілі ў Паветраных сілах ЗСУ. Зафіксаваныя траплянні ў жылую цывільную забудову.
У той жа час мэр Харкава Ігар Тэрэхаў удакладніў, што ўдары былі зробленыя як па прыватных, так і шматкватэрных дамах.
«Папярэдне – удары «Шагэдамі» па жылых дамах. Як па прыватных, так і шматкватэрных. Інфармацыя аб пацярпелых удакладняецца», – напісаў ён.
Станам на 7:00 раніцы было чацвёра загінулых і 12 пацярпелых. Трое загінулых – ратавальнікі.
Ася Саковіч belsat.eu
