Справу супраць Ціханоўскай, Латушкі, прадстаўнікоў Каардынацыйнай рады перадалі ў Генпракуратуру
Следчы камітэт завяршыў папярэдняе расследаванне ў дачыненні да Святланы Ціханоўскай, Паўла Латушкі, Вольгі Кавальковай, Сяргея Дылеўскага, Марыі Мароз. Справу ў парадку спецыяльнай вытворчасці перадалі ў Генпракуратуру, паведамляе прэсавая служба СК.
Галоўнае следчае ўпраўленне Следчага камітэту паведамляе, што ў парадку спецыяльнай вытворчасці следчыя завяршылі папярэдняе расследаванне ў дачыненні да Святланы Ціханоўскай, Паўла Латушкі, Вольгі Кавальковай, Сяргея Дылеўскага, Марыі Мароз – прадстаўнікоў Каардынацыйнай рады.
Крымінальную справу перадалі ў Генеральную пракуратуру для накіравання ў суд.
Раней старшыня СК паведамляў, што справу хутка пачнуць разглядаць у судзе. Па справе прызначылі адвакатаў. Напярэдадні Павел Латушка заявіў, што адмаўляецца ад адваката, якога яму прызначылі па «спецвядзенні».
«Чалавека я гэтага не бачыў і не чуў, пра існаванне яго даведаўся са СМІ. Са мной ён ні разу не звязваўся, пра сябе не заяўляў, хаця ў судзе вядомыя мае кантакты», – напісаў палітык.
Спецыяльнае вядзенне прадугледжвае судовае паседжанне без прысутнасці абвінавачанага. Палітыкі прапаноўвалі прысутнічаць на судзе праз відэасувязь, але чыноўнікі гэтага не пажадалі.
Алена Аляксандрава belsat.eu
