Міністэрства антыманапольнага рэгулявання і гандлю дазволіла ўлучаць у цэны тавараў кошт дастаўкі. Адпаведную пастанову апублікавалі на Нацыянальным партале прававой інфармацыі. Гаворка ідзе пра цэны, што рэгулююцца дзяржаваю.
Раздробнаму гандлю дазволілі пры вызначэнні цаны ўлучаць у яе «аплату паслугаў арганізацыяў і індывідуальных прадпрымальнікаў у дастаўцы тавараў». Пра гэта гаворыцца ў пастанове, што ўхваліла міністэрства антыманапольнага рэгулявання і гандлю.
У дакуменце асобна пералічваюцца выдаткі, якія можна ўлучаць у цэны тавараў, калі дастаўшчык – ІП ці арганізацыя – «уваходзіць у адну групу асобаў з вытворцамі, імпарцёрамі і суб’ектамі гандлю»:
- заробак кур’ераў;
- выдаткі на паліва;
- выдаткі на зарадку электрамабіляў;
- амартызацыя транспартавых сродкаў;
- выдаткі на тэхабслугоўванне транспарту;
- выдаткі на страхаванне транспарту;
- транспартавы падатак;
- выдаткі на арэнду або лізінг транспарту;
- праезд па платным дарогам.
У леташнім кастрычніку, калі інфляцыя амаль дасягнула 14%, цяперашнія ўлады ўзяліся за татальнае рэгуляванне цэнаў. Правілы цэнаўтварэння не раз змянялі, і планавалася, што адпаведная пастанова ўраду будзе дзеяць мінімальна да канца 2023 года.
Кантроль дзяржавы сапраўды дапамог знізіць інфляцыю, якая ў верасні сёлета склала 2% год да года і 3,6% у параўнанні з леташнім снежнем. Аднак такое штучнае стрымліванне цэнаў, а таксама мяккая манетарная палітыка Нацбанку пагражае рэзкім ростам коштаў у будучыні, папярэджваюць эканамісты.
СК belsat.eu
