«Нашы грошы»: У Беларусі патаннелі 56 % тавараў і паслуг, але нават чыноўнікі не радыя
Паводле звестак Нацыянальнага банку, у верасні 2023 года 56,4% тавараў у спажывецкім кошыку беларуса патаннелі адносна верасня 2022 года. Месяцам раней такіх было 51%, а, напрыклад, у студзені толькі 8,4 %.
Акрамя тавараў, якія за год патаннелі, яшчэ каля пятай часткі падаражэлі не больш як на 5 %. 12,4 % тавараў падаражэлі на 5-10 % і толькі 11,5 % тавараў сталі даражэйшымі больш як на 10 %.
«Чарговы раз карціна з коштамі, калі верыць Нацбанку і Белстату, выглядае прыгожа. Аднак, ёй радуюцца ўсё менш нават чыноўнікі, усведамляючы, што з кожным месяцам інфляцыйны навес з прычыны празмернага рэгулявання коштаў толькі павялічваецца», – заяўляюць аўтары праекту «Нашы грошы».
Паводле іх, «рынкавыя фактары кажуць на карысць таго, што сітуацыя будзе мяняцца ў адваротны бок: шырокая грашовая маса хутка павялічваецца, расце доля наяўных грошай, даходы насельніцтва працягнулі імклівы рост, пераграваючы эканоміку, пры гэтым курсы замежных валют растуць».
Інфляцыя ў Беларусі застаецца нізкай у звязку з татальным дзяржаўным рэгуляваннем. Аднак праз мяккую манетарную палітыку і ўсё большае аддаленне коштаў на паслугі, што не рэгулююцца, ад коштаў на нехарчовыя тавары ўзнікае рызыка рэзкага росту цэнаў, гаворыцца ў чарговым аглядзе даследчага цэнтру BEROC.
Якуб Хруст belsat.eu
