Сёння міністр замежных справаў Вугоршчыны Петэр Сіярта прыляцеў у Менск. А зусім нядаўна кіраўнік выведкі Украіны Кірыла Буданаў «аддаў належнае» Аляксандру Лукашэнку, што той не дапусціў уварвання Узброеных сілаў Беларусі на тэрыторыю паўднёвай суседкі. Лукашэнка ж пахваліў Зяленскага, якога назваў Уладзімірам Аляксандравічам. Што гэта значыць?
Пачатак вайны Расеі супраць Украіны, калі з тэрыторыі Беларусі паляцелі ракеты на ўкраінскія гарады, стаў рубіконам, перакрочваннем якога, здавалася б, Аляксандр Лукашэнка назаўсёды перакрэсліў братнія адносіны паміж беларусамі і ўкраінцамі. Але Яўген Магда, дырэктар украінскага Інстытуту сусветнай палітыкі, з гэтым нязгодны:
«Паколькі беларускія вайскоўцы не ўвайшлі ва Украіну, а я думаю, што яны і не ўвойдуць, то шанцы на нармалізацыю пасля расейска-ўкраінскай вайны захоўваюцца».
Але для самога Аляксандра Лукашэнкі, паводле Яўгена Магды, гэта нічога добрага не значыць: «Пасля завяршэння расейска-ўкраінскай вайны, я думаю, Лукашэнка доўга не ўтрымаецца. Хаця я не выключаю, што ён будзе круціць кульбіты, што яго ўзялі ў закладнікі, што яго прымусілі».
Сузаснавальнік выдання «Reform.by» Аляксандр Атрошчанкаў бачыць у абмене рэверансамі паміж Буданавым і Лукашэнкам чарговую спробу апошняга «прадаць дохлага каня», што ёсць выключнай здольнасцю самаабвешчанага кіраўніка Беларусі, якой той ужо неаднойчы карыстаўся. Атрошчанкаў спадзяецца, што ўкраінскае кіраўніцтва на гэта не купіцца. У той жа час ён заклікаў беларусаў не крыўдзіцца на гэтыя заявы, бо Буданаў «сказаў тое, што яму дзеля працы трэба».
Яўген Магда пагадзіўся і зазначыў, што кіраўніцтва Украіны разумее: верыць Лукашэнку нельга, але і дражніць яго ніхто не будзе. Чаму ж Лукашэнка не паслаў войска ва Украіну, дзе, паводле Атрошчанкава, спадзяваўся паўдзельнічаць у парадзе ў Кіеве, а таксама ў карных аперацыях дзеля ўсталявання акупацыйнага расейскага рэжыму, эксперты ілюзіяў не маюць: самаабвешчаны кіраўнік Беларусі ацаніў усе рызыкі для свайго рэжыму, пра хісткасць якога ведаюць і ў Маскве. І ў выпадку неабходнай на выпадак вайны мабілізацыі магло б усё скончыцца вельмі хутка:
«А што, удзельнікі пратэстаў 2020 года ўсе выехалі? Усе змагары выехалі? Даваць зброю сваім учорашнім апанентам? А куды яны затворы будуць ператоргваць? У які бок? Для яго гэта важны момант. Яшчэ адзін момант: беларускае войска за гады незалежнасці ніколі не ваявала і калі беларускія вайскоўцы, гіпатэтычна, пойдуць ва Украіну, то ім, прабачце, дадуць адлуп. Гэта аб’ектыўная рэчаіснасць, бо ўкраінскія вайскоўцы так ці інакш ваююць з 2014 года. І калі пойдзе плынь целаў, хто скажа, колькі трэба забітых беларускіх вайскоўцаў, каб рэжым Лукашэнкі пачаў хістацца?» – зазначыў Яўген Магда.
Заяву ж Буданава ўкраінскі эксперт ахарактарызаваў як палітычна недальнабачную: «Беларускія добраахвотнікі падпарадкоўваюцца Галоўнаму ўпраўленню выведкі. І зрабіць такі рэверанс асобе, з якой у шмат каго з іх асабістыя рахункі – гэта, на маю думку, не зусім правільна».
Украіна за ўвесь час незалежнасці, паводле Магды, не мела стратэгіі адносна Беларусі. Ён раіць ісці тут шляхам Польшчы, якая мае свайго адмысловага прадстаўніка пры дэмакратычных сілах. Магда лічыць магчымаю ў перспектыве сустрэчу прэзідэнта Украіны і абранай прэзідэнткі Беларусі: «Я не думаю, што ў Зяленскага звалілася б капітанская фуражка, капітана КВК, калі б ён сустрэўся з Ціханоўскай». Але для гэтага, відаць, яшчэ не прыйшоў час.
У той жа час ні Магда, ні Атрошчанкаў не лічаць імаверным сцэнаром для Беларусі «гіпатэтычнае» ўваходжанне таго ж палка Каліноўскага з Украіны ці Паспалітага рушэння з Польшчы і Літвы ў Беларусь, бо гэта будзе парушэннем міжнароднага права.
«Беларусы мусяць разумець: Украіна цяпер не ў тым стане, каб вызваляць Беларусь», – сказаў Аляксандр Атрошчанкаў.
Стасункі Беларусі і Украіны разбіралі госці праграмы «Двубой» з Віталём Цыганковым – Аляксандр Атрошчанкаў і Яўген Магда.
Калаж з фота: БелТА; publicdomainpictures